Көкшетау полицейлері 80 жасқа толған ішкі істер органдарының ардагерін мерейтойымен құттықтады

КӨКШЕТАУ. ҚазАқпарат - Көкшетау полицейлері ішкі істер органдарының ардагері, отставкадағы милиция подполковнигі Жəнібек Тілеубердинді 80 жас мерейтойымен құттықтады. Бұл туралы облыстық ІІД баспасөз қызметінен хабарлады.

Ақмола облыстық ІІД басшысы, полиция полковнигі Ержан Сəденов, ІІД ардагерлер кеңесінің төрағасы, отставкадағы милиция подполковнигі

Дəуітбек Нұрғалиев жəне ІІД басшысының кадр жұмысы бойынша орынбасары, полиция полковнигі Бейбіт Əділханов ішкі істер органдарының ардагері Жəнібек Тілеубердинді үйіне барып, 80 жас мерейтойымен құттықтады.

Жəнібек Қазыбекұлы ішкі істер органдарында 25 жылдан астам уақыт қызмет істеді. Оның барлығы дерлік тергеу бөлімшесінде өтті. Өз қызметіне адал ардагер полицей көптеген марапаттарға ие болып, ондаған шәкірт тəрбиеледі. Бүгіндері шəкіттері ішкі істер органдарында абыройлы қызмет атқаруда. Қария зейнеткерлікке шыққаннан кейін де қол қусырып отырған жоқ, ұзақ уақыт жас тəртіп сақшыларына өз тəжірибесімен бөлісіп, əдістемелік көмегін аямады.

«...Биыл еліміз Тəуелсіздігінің 25 жылдығын атап өтуде. Жас мемлекеттің аяғынан нық тұруына ардагерлердің қосқан үлесі зор. Соның бірі ретінде еліміздің полициясының қалыптасуына елеулі үлес қосқан Жəнібек Қазыбекұлының еңбегі ерекше...», дей келе Ержан Сəденов, ардагер əріптесіне Құрмет грамотасы, Алғыс хат жəне бағалы сыйлықты табыс етті.