Валюта бағамдары:
    usd/kzt 476.18 eur/kzt 485.56

    rub/kzt 7.76 cny/kzt 70.34
Ауа райы:
Нұр-Сұлтан: 1 °С
Алматы: 15 °С

Киіктерді атуға қатысты шешім 1 айдың ішінде қабылданады – БҚО әкімі

2022 жылғы 20 маусым 12:43

НҰР-СҰЛТАН. ҚазАқпарат – Киіктерді атуға қатысты шешім 1 айдың ішінде қабылданады. Бұл туралы бүгін Орталық коммуникациялар қызметінде өткен баспасөз мәслихатында Батыс Қазақстан облысының әкімі Ғали Есқалиев айтты, деп хабарлайды ҚазАқпарат тілшісі.

«Соңғы уақытта бұл сұрақты тілшілер қауымы жиі қозғап жатыр. «Киіктерді ату, атпауды неге министрлік қана шешу керек?» деп жатқандар да бар. Меніңше, министрлік те, біз де жауапты болуымыз керек. 2023 жылға дейін елімізде киік атуға мораторий болғаны баршаңызға аян. Таяуда осы мәлесеге арналған жиын өтіп, онда мораторийдің өз мақсатына жеткені айтылды. Яғни киіктердің саны қауіпті көлемнен асты. Үкіметтің қаулысына сәйкес биыл 1 шілдеден бастап резерват ашылуы тиіс», - деді Ғали Есқалиев.

Облыс басшысының айтуынша, киіктерді атуға қатысты шешім бір айдың көлемінде қабылданады.

«Әрине, алдымен киіктердің популяциясын жоғалтпауымыз керек. Резерваттың мақсаты – киіктердің санын арттыру емес, популяциясын сақтап қалу. Сарапшылардың пікірінше шамамен 150-200 мың бас киікті сақтап қалу керек. Одан бөлек, киіктердің санын біз реттеуіміз қажет. Киіктердің көбеюі ауыл шаруашылығына да зардабын тигізіп жатыр. Сондықтан бұл мәселе шешілуі тиіс. Киіктерді атуға қатысты шешім 1 айдың ішінде қабылданады», - дейді ол.

Бұған дейін ҚР Экология, геология және табиғи ресурстар министрі Серікқали Брекешев киіктерді атуға рұқсат берілуі мүмкін екенін айтқан еді.


Автор:

Дәулет Ізтілеу

Новости по теме
Ұқсас жаңалықтар
Серіктестер жаңалықтары