Кедендік әкімшілендіруді күшейту есебінен бюджетке қосымша 150 млрд теңге түседі - Жамаубаев
«Кеден саласын тәртіпке келтіру мақсатында жедел және жүйелі іс-шаралар қабылдануда. Оның ішінде әсіресе цифрландыру басым бағыт болады. Жедел іс-шаралар бөлігінде декларацияларды бақылау және шығару жөніндегі кедендік функциялар орталықтандырылды. 9 уәкілетті экономикалық операторға және басқа да ірі импорттаушыларға қатысты тексерулер аяқталып қалды. Шекарадағы электрондық кезек жүйесін жетілдіру бойынша жұмыстар жүргізілуде. Уәкілетті экономикалық операторларға қойылатын біліктілік талаптары заңнамалық түрде күшейтілетін болады», - деді министр.
Оның атап өтуінше, жүйелі шаралар аясында АСТАНА-1 және Е-терезе ақпараттық жүйелері жетілдірілуде. Тәуекелдерді басқару жүйесіне субъектіге бағдарланған тәсіл және деректерді интеллектуалды талдау енгізіледі. Электрондық шот-фактуралар негізінде тауарларды қадағалау жүйесін одан әрі дамыту жүргізіліп жатыр.
«Бұл импорттан бастап тұтынушыға дейінгі барлық өткізу тізбегі бойынша салықтық бақылауға мүмкіндік береді. Бұдан басқа ҚХР-мен кедендік статистиканың алшақтығын төмендету, сондай-ақ кедендік инфрақұрылымды жаңғырту бойынша кешенді іс-шаралар қабылданып жатыр. Жалпы, биылғы жылы кедендік әкімшілендіруді күшейту есебінен республикалық бюджетке қосымша шамамен 150 млрд теңге түседі деп жоспарлануда. Бұл жұмыс жете бақылауға алынған», - деді Ерұлан Жамаубаев.