Kazsat-2 байланыс спутнигі орбитада 4 мыңыншы айналымын жасады
2022 жылғы 5 шілде 18:52

Kazsat-2 байланыс спутнигі орбитада 4 мыңыншы айналымын жасады

НҰР-СҰЛТАН. ҚазАқпарат – Қазақстанның Кazsat-2 байланыс және хабар тарату спутнигі орбитада 4 мың тәуліктен астам уақыт жұмыс істеп келеді. Мұндай статистиканы «Ақкөл» ғарыш байланыс орталығының (ҒБО) инженерлері айтты, деп хабарлайды ҚазАқпарат тілшісі.

«Ғарыш құрылғысы штаттық режимде жұмыс істеп жатыр, борт жүйесінде ешқандай ақау жоқ», - деді басшылық спутниктің жағдайы туралы.

«Спутникті басқару оңай болып көрінгенімен, мұнда үлкен ұжым жұмыс істейді: баллистика мамандары, борт жүйесінің талдаушылары мен ғарыш құрылғысын басқару мамандары. Олардың көбісі ұжымда спутник алғаш ұшырылған күннен бастап еңбек етуде. Біз үшін 4000 айналым немесе Kazsat-2 спутнигінің ұшқанына 4000 тәулік толуы – маңызды оқиға», - деді «Ақкөл» ҒБО Ұшуды басқару орталығының басшысы Бекболот Азаев.

Kazsat-2 ғарыш аппараты ұшу кезінде 61,23 кг отын (ксенон) жұмсады. Қалғаны - 78,77 кг. Есептелген мәліметтер бойынша, отын 2027 жылға дейін жетеді.

2021 жылы жүргізілген техникалық аудит негізінде Kazsat-2 спутнигін пайдаланудың есептік мерзімі 2023 жылдан бастап 2026 жылдың соңына дейін ұзартылды.

KazSat-2 ғарыш аппараты 2011 жылғы 16 шілдеде Байқоңыр ғарыш айлағынан геостационарлық орбитаға (ГСО) ұшырылды. Бұл спутник телерадио хабарларын тарату, телефония, интернет желісіне қолжетімділік, деректерді беру қызметтерін ұсынады. KazSat-2 Қазақстан Республикасының бүкіл аумағына, Орталық Азия елдеріне, Ресейдің орталық бөлігіне қызмет көрсетеді.



Ұқсас жаңалықтар

Jańalyqtar

Үрдіс

MURAǴAT