«ҚазМұнайГаздың» арнайы жұмыс тобы Жаңаөзен кәсіпкерлерімен кездесті

ЖАҢАӨЗЕН. ҚазАқпарат – Жаңаөзенде «ҚазМұнайГаз» ҰК АҚ (ҚМГ) басқарма төрағасының орынбасары Дәулетжан Хасанов бастаған арнайы жұмыс тобы қаладағы 30-ға жуық кәсіпорынның басшыларымен кездесті, деп хабарлайды ҚазАқпарат ҚМГ-сайтына сілтеме жасап.

Кездесуге «Өзенмұнайгаз» АҚ бас директоры Н.Қилыбай, Жаңаөзен қаласының «Атамекен» кәсіпкерлер палатасының директоры А.Шарапатдинов, жергілікті атқарушы орган өкілдері, сондай-ақ мәслихат депутаттары қатысты.

Жаңаөзен аумағында бірқатар тауар өндірісі мен қызмет түрлерін дамыту мәселесі талқыланды.

Д.Хасанов атап өткендей, талдау барысында «Өзенмұнайгаз» компаниясының сатып алу қызметінде болашақта отандық өндірушілер жеткізуіне болатын тауар мен қызмет түрлерінің бар екені анықталды. «Бұл шара өңірдегі жұмыссыздық мәселесін шешуге және жергілікті тауарлар мен қызметтерді дамытуға ықпал етеді», - деп атап өтті жұмыс тобының жетекшісі.

Жиынға қатысушылар өңірдегі қажеттіліктерді анықтап, тиісті ұсыныстарды қарайтын арнайы шағын топ құру туралы шешім қабылдады.

«Бүгінде қала кәсіпкерлері ысырмаларды жөндеу, шыныпластика құбырларын жөндеу, гидравликалық кілтті жалға алу және металл сынықтарын радиациядан тазарту сияқты қызметтерді дамыту бойынша жобаларды қолға алғанын айта кету керек.

Арнайы жұмыс тобы жергілікті тауар мен қызмет түрлері бойынша перспективалы бағыттарды анықтау үшін «Өзенмұнайгаз» АҚ сатып алу қызметін толық талдау жұмысын жалғастырады», - делінген ҚМГ мәліметінде.

Еске салайық, «ҚазМұнайГаздың» арнайы жұмыс тобы «Өзенмұнайгазда» көптеген бұзушылық анықтаған болатын.

Ал Бас прокуратура «Өзенмұнайгаз» тендерлерінің заңдылығын зерделейтінін айтты.