Қазгеоақпарат және Қазгеология мекемелері біріктіріледі
2022 жылғы 19 мамыр 12:35

Қазгеоақпарат және Қазгеология мекемелері біріктіріледі

НҰР-СҰЛТАН. ҚазАқпарат – «Қазгеоақпарат» және «Қазгеология» мекемелерін біріктіру арқылы Ұлттық геологиялық қызмет құрылады. Бұл жайында «Қазгеоақпарат» республикалық геологиялық ақпарат орталығы» ЖШС бас директоры Жанат Кәрібаев айтты, деп хабарлайды ҚазАқпарат тілшісі.

«Бүгінде жарғылық капиталына 100 пайыз мемлекет иелік еткен «Қазгеоақпарат» республикалық геологиялық ақпарат орталығы» ЖШС-ні «ҚР Ұлттық геологиялық қызметі» акционерлік қоғамы етіп қайта құруды ұйымдастыру жұмыстары жүріп жатыр. Келесі кезеңде оған «Қазгеология» ұлттық геологиялық барлау компаниясы» АҚ-ны қосу жоспарланған», - деді ол орталық коммуникациялар қызметінде өткен брифингте.

Оның сөзінше, «Қазгеоақпарат» РГАО» ЖШС мен «Қазгеология» АҚ-ны біріктіру шешімі Ұлыбритания, Канада, Финляндия сияқты елдердің геологиядағы тәжірибесін ескере отырып қабылданған.

Сондай-ақ, Жанат Кәрібаев Ұлттық геология қызметінің негізгі жұмыс бағыттарын атады. Олар:

- жер қойнауын ұтымды пайдалану және минералдық-шикізат базасын молайту саласындағы мемлекеттік саясатты іске асыру;

- жер қойнауына геологиялық зерттеу жүргізуді ғылыми негіздеу мақсатында елдің бейіндік жоғары оқу орындарымен өзара іс-қимыл жасау;

- пайдалы қазбалардың қиын алынатын қорларын игеру үшін озық технологияларды қолдану, цифрландыру, геоақпараттық жүйелер және ірі табысты компаниялармен тәжірибе алмасу;

- геология саласындағы бағдарламалар мен стратегияларды қалыптастыру;

- сервистік қызметтер;

- бастапқы геологиялық ақпараттың сақталуын қамтамасыз ететін Керн қоймасын қалыптастыру;

- халықаралық аккредитациясы бар зертханалар ашу;

- геологиялық ақпаратты жинау, сақтау, өңдеу, жүйелеу және ұсыну үшін қорда сақтау;

- инвестициялық жобаларды әзірлеп, өмірге енгізу;

- мемлекеттік мониторинг;

- «Kaznedra» бірыңғай платформасында барлық бизнес-процестерді автоматтандыру.

Айта кетейік, ҚР Президенті Қасым-Жомарт Тоқаев 2021 жылы Қазақстан халқына Жолдауында осындай тапсырма берген болатын.


Jańalyqtar

MURAǴAT