Қазақтың ұлттық «Ортеке» биі ЮНЕСКО-ның тізіміне енгізіледі
2022 жылғы 24 маусым 22:00

Қазақтың ұлттық «Ортеке» биі ЮНЕСКО-ның тізіміне енгізіледі

НҰР-СҰЛТАН. ҚазАқпарат – Қазақтың ұлттық биі - «Ортеке» ЮНЕСКО-ның тізіміне енгізіледі. Бұл мәліметті ҚазАқпарат тілшісінің сауалына жауап берген Мәдениет және спорт министрлігінің баспасөз қызметі хабарлады.

Министрлік мәліметінше, сарапшылардан құралған комиссия ұлттық биді ЮНЕСКО-ның тізіміне қосу ұсынысын 2019 жылы жасаған.

«Қандай да бір мұраны аталған ұйымның тізіміне енгізу үшін қатысушы ел бірқатар талаптарды орындауы керек. Ең алдымен мемлекет таныстыру бейнеролигін ағылшын және француз тілдерінде түсіріп ЮНЕСКО-ның бас штабына ұсыныс жолдайды. Материалдық емес мәдени мұраны сақтау жөніндегі үкіметаралық комитет мүшелері ұсынысты қарастырып, шешімді дауыс беру арқылы қабылдайды. Мәселен, біз «Ортеке» биін Үкіметаралық комитет қарауына 2019 жылы ұсындық. Дегенмен оны ЮНЕСКО тарапынан ілгерілету процессі биыл ғана басталды», - деп мәлім етті министрліктің баспасөз қызметі агенттік тілшісінің сауалына орай.

Сондай-ақ ведомство өкілдері ЮНЕСКО неліктен ұлтымыздың осы өнеріне қызығушылық танытқанын айтты.

«Қазақтың этномузыка және этнотеатр саласындағы зерттеулерінде «Ортеке» өнері туралы деректер аз. Дегенмен кейбір ғалымдардың еңбектерінде «Ортекенің» 3 мың жылдан астам уақыт бұрын пайда болғаны көрсетілген. Белгілі музыкатанушы ғалым Ахмет Жұбанов қазақтың қуыршақ театры өз бастауын осы өнерден алатынын атап өткен. Сонымен қатар бұл туралы ғалым Әлкей Марғұланның, белгілі күйші және зерттеуші Абдулхамит Райымбергеновтің, Мұрат Өскембаевтың жазбаларында кездеседі. Бұдан басқа «Ортеке» ежелгі қолданбалы өнер шеберлерінің еңбектеріне арқау болған. Оған дәлел Тамғалы, Ешкіөлмес, Күлжабасы сияқты ең көне ескерткіштерде бейнеленген петроглифтер. Осыларды ескере келе, аталған өнер ЮНЕСКО-ның материалдық емес мұрасының тізіміне енгізуе нақты лайық деп есептейміз», - делінген хабарламада.

Ведомство 2013 жылдан бастап Қазақстанның материалдық емес мәдени мұраларының ұлттық тізімін жасау, оны ЮНЕСКО-ға енгізу жұмыстарын жүргізіп келеді. Осы уақытқа дейін қазақ халқының 11мәдени мұрасы ұйымның тізіміне кірді.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT