Қазақстанның үздік шахматшысы Тәуелсіздік күніне орай балалармен шахмат ойнады

АЛМАТЫ. SPORTINFORM - ҚазАқпарат - Алматыда шахмат рейтингінің нөмірі бірінші ойыншысы, Қазақстанның ұлттық құрамасының мүшесі Ринат Жұмабаев жас жеткіншектермен шахмат сеансын өткізді, деп хабарлайды «SPORTINFORM» САА.

Қазақстанның шахмат федерациясының рейтингі бойынша еліміздің ең мықты шахматшысы Алматыда балалармен 28 тақтада қайырымдылық сеансын өткізді. Шара Тәуелсіздік күні мерекесіне арналды.

Айта кететін мәселе, шараға Қазақстанның тәуелсіздігіне қанша жыл толса, сонша ойыншы қатысы. Ойыншылардың кейбірі еліміз бен Алматы қаласының, тіпті Азия чемпионаттарының жүлдегерлері.

Жас жеткіншектерді әп-сәтте-ақ ұта салмақ болған гросмейстердің сөзінше, балалармен бақ сынасу оған оңайға соқпаған. Сөйтіп, болашақ чемпиондармен 4 сағат бойы арпалысқан гросмейстер балалардың кейбірімен тең түссе, кейбірінен тіпті ұтылып та қалған.