Қазақстанның мұнай өңдеу зауыттары АИ-95-ті шығара бастады
«92-ші бензиннің өңірлердегі қоры шамамен 200 мың тоннаны құрайды, бұл әзірге бензин жағдайы қалыпты деп айту үшін жеткілікті. Қазақстандағы 92-ші бензинді тұтынудың тәуліктік нормасы - 10 мың тонна. Еліміздегі үш мұнай өңдеу зауытынан күніне 8,5 мың тонна бензин алынады және тәулігіне 3-4 мың тонна бензин импортпен жеткізіледі», - деді Д.Тиесов.
«ҚазМұнайГаз» өкілі АИ-95 маркасына қатысты жағдай өзгеше екенін атап өтті.
«95-ші бензин бойынша жағдай сәл қиындау, кей өңірлерде шектеу қойылды және ОҚО, ШҚО, Алматы және Қызылорда облыстарында карталар мен талондар бойынша сатылып жатыр. Қалған өңірлерде шектеу жоқ. Қазақстан бойынша АИ-95 бензинінің 14,5 мың тонна қоры бар, бір айға шамамен 20 мың тонна қажет», - деп атап өтті ол.
Сол себепті, компания өкілдерінің айтуынша, қазақстандық мұнай өңдеу зауыттарының бір бөлігі АИ-95 маркасын шығаруға көшкен.
«Дизельді отын бойынша биыл шамамен 168 мың тонна қорымыз бар. Тұтас республика бойынша жанар-жағармай материалдары жағдайы тұрақты», - деп толықтырды өз сөзін Данияр Тиесов.