Қазақстаннан үшінші боксшы әлем чемпионатының финалына шықты

АСТАНА. ҚазАқпарат - Ташкент қаласында ерлер арасында өтіп жатқан бокстан әлем чемпионатында Дулат Бекбауов финалға шықты, деп хабарлайды ҚазАқпарат тілшісі.

Қазақстандық спортшы 67 келіге дейінгі салмақта грузиялық Лаша Гурулимен шеберлік байқасты.

Бірінші кезеңде төрешілердің бәрі Дулат басым деп тапты. Екінші раундта да солай болды.

Қорытынды есеп - 5:0, жекпе-жек Дулаттың пайдасына шешілді.

Бүгін кешкі сессияда Қазақстаннан ұлттық құрама капитаны Асланбек Шымбергенов пен Нұрбек Оралбай рингке шығады.

Еске сала кетейік, бүгін қазақстандық бес боксшының әлем чемпионатының финалына шығу үшін таласатынын жазған болатынбыз.

Сондай-ақ Қазақстан құрамасынан алғашқы болып Санжар Тәшкенбай әлем чемпионатының финалына шықты.

Одан кейін Махмұд Сабырхан әлем чемпионын ұтып, финалға жолдама алды.