22:25, 31 Шілде 2019 | GMT +6
Қазақстандықтардың алғашқы легі қажылыққа аттанды
АЛМАТЫ. ҚазАқпарат - Бүгін 400 қазақстандық қажылық парызын өтеу үшін Алматы әуежайынан Сауд Арабиясына ұшып кетті, деп хабарлайды ҚазАқпарат тілшісі.
«Қажы болу – оңай ғибадат емес. Бұдан да маңызды мәселе – қажы болып өмір сүру. Қажы деген сөздің тағы бір мағынасы ешқашан жамандықтарға жоламау дегенді білдіреді. Қажылық жасау рәсімдері санаулы күндерде аяқталады. Ал «қажы» атанып қалу – өмір бойы жалғасады«, - деді Қазақстан мұсылмандары діни басқармасының төрағасы, Бас мүфти Серікбай қажы Ораз шығарып салу рәсімінде.
Бүгін Алматы әуежайынан 400-ге жуық адам парызын өтеуге жол тартты.
»Қажы болу – қажылық сапарынан соң тап-таза парақты еш кірлетпеуге тырысу, ғибадатта қайратты болу, үлгілі мұсылман болу, жасаған тәубені қайта бұзбау, уәдеге адал болып, сөздің үдесінен шығу деген сөз...«, - деді ол.
Еске сала кетсек, биыл елімізден 3200 адам қажылық парызын өтемек.