Қазақстандықтар өз уақытын қалай пайдаланады

АСТАНА. ҚазАқпарат - ҚР Ұлттық экономика министрлігінің Статистика комитеті қазақстандықтардың өз уақытын қайда жұмсайтындарын анықтады, деп хабарлайды ҚазАқпарат тілшісі.

«Зерттеу нәтижесіне сәйкес, қазақстандықтар тәуліктің 53,6% немесе 12 сағат 50 минутын жеке күтімге жұмсайды (ұйқы - 9 сағат 13 минут, тамақ жеу, сусын ішу - 2 сағат 4 минут, жеке гигиена мен күтім - 1 сағат 27 минут және т.б.). Жұмысқа (жұмыспен қамтуға) - 2 сағат 59 минут (12,4%), үй шаруашылығын жүргізуге - 2 сағат 57 минут (12,3%), оқып-үйренуге - 52 минут (3,5%), тұтыну тауарларын алуға - 18 минут (1,2%) және қалған 4 сағат 4 минут (17,0%) бос уақыт ретінде саналады», - делінген хабарламада.

15 және одан жоғары жастағы ер адамдар бір күнде орта есеппен жұмысқа 5 сағат 29 минут уақытын жұмсайды, әйелдер үшін бұл көрсеткіш 4 сағат 34 минутты құрайды. Алайда әйелдер үй шаруашылығымен айналысуға (4 сағат 14 минут) ер адамдарға қарағанда (1 сағат 28 минут) көбірек уақыт жұмсайды. Ерлердің бос уақыты (4 сағат 6 минут) әйелдерге қарағанда (2 сағат 45 минут) шамамен 2 есеге артық.

Жұмыс күні жұмыспен қамтылған ерлер жұмысқа орта есеппен 9 сағат 1 минут жұмсайды, әйелдер - 7 сағат 53 минут, тиісінше бос уақытқа 2 сағат 35 минут және 1 сағат 44 минут қалады.

Айта кетейік, 2018 жылдың 2-10 сәуірі аралығында ҚР Ұлттық экономика министрлігі Статистика комитеті «Қазақстан Республикасы халқының уақыт бюджетін пайдалануы» модульдік зерттеу жұмыстарын жүргізді. Бұл зерттеу 5 жыл сайын ұйымдастырылады. Зерттеу жұмыстарына 10 жастан жоғары 32 301 респондент қатысқан.