Қазақстандық вакцина 2-3 доллар көлемінде болады – министр

НҰР-СҰЛТАН. ҚазАқпарат – Клиникалық сынақтан өткенге дейін коронавирус вакцинасының бағасы қанша болатыны нақты белгілі емес. Бұл туралы Орталық коммуникациялар қызметі алаңында «ҚР ДСМ өзекті мәселелері: Пандемия кезіндегі медициналық көмектің қол жетімділігі туралы» тақырыпта өткен онлайн брифингіде айтылды, деп хабарлайды ҚазАқпарат тілшісі.

«Біз Қазақсатндық вакцинадан да үміт күтеміз. Қазақстандық вакциналар клиникаға дейінгі сынақтан сәтті өткен. Енді клиникалық сынақтан өтіп жатыр. Оны сынап көргісі келетін еріктілер де жиналып қойды. Сынақтың 1, 2-сатысы қараша, желтоқсан айына қарай аяқталып, нәтижесін көреміз. Сол кезде ол вакцинаның қаншалықты тиімді, қауіпсіз екенін білеміз», - дейді ҚР Денсаулық сақтау министрі Алексей Цой.

Оның айтуынша, Қазақстанда вакцина өндіретін зауыт салынып жатыр.

«Ол зауыттың қазақстандықтардың қажеттіліктерін өтеуге күші жетеді. Өз вакцинамыз сынақтың барлық сатысынан өткен жағдайда осы зауыттан шығарылатын болады. Клиникалық сынақтан өткенге дейін вакцинаның бағасы қанша болатыны нақты белгілі емес, бірақ 2-3 доллар көлемінде болады деп ойлаймыз», - дейді ол.