22:03, 07 Ақпан 2019 | GMT +6
Қазақстандық сарбаздар «Дала қыраны» оқу-жаттығуына қатысады
АЛМАТЫ. ҚазАқпарат - Алматыда «Дала қыраны - 2019» тактикалық-арнайы бітімгерлік оқу-жаттығуын өткізу бойынша конференция өтті, деп xабарлайды ҚазАқпарат ведомствоның баспасөз қызметіне сілтеме жасап.
«Бейбітшілік үшін серіктестік» оқу орталығының базасында Ұлыбритания, Қазақстан, Қырғызстан, АҚШ, Тәжікстан және Түркия Қарулы Күштерінің, НАТО штаб-пәтері өкілдерінің қатысуымен «Дала қыраны - 2019» тактикалық-арнайы бітімгерлік оқу-жаттығуын өткізу бойынша басты жоспарлы конференция өтті.
Конференция барысында тараптар әкімшілік, медициналық, тылдағы және әскери-теxникалық қамсыздандыру мәселелерін талқылады. Алты елдің әскери құрылымдары қатысатын оқу-жаттығу биыл маусымда Қазақстан Республикасында өтеді деп жоспарлануда.
Қазақстан Қарулы Күштерінен 120 әскери қызметші қатысады. Алдағы кездесу нәтижесінде оқу-жаттығуға дайындау бойынша әрі қарай жұмыстар жүргізу үшін жетекші құжатқа қол қойылады.