Қазақстандық кәсіпорындар күніне 170 мың медициналық маска шығарады

НҰР-СҰЛТАН. ҚазАқпарат – ҚР Индустрия және инфрақұрылымдық даму вице-министрі Берік Қамалиев қазақстандағы медициналық маска өндірі туралы айтып берді, деп хабарлайды ҚазАқпарат.

«Медициналық маска бойынша Алматы, Жамбыл, Түркістан облыстарында және Шымкент қаласында 5 кәсіпорын бар. Біріншіден, қазіргі уақытта бұл компаниялар күніне 170 мың медициналық масқа шығарады. Екіншіден, елімізде бір айда 5 млн маска шығарылады және қазір отандық өндірушілердің өз көрсеткішін арттырып, 5 млн-нан 6,5 млн-ғадейін маска шығаратын мүмкіндіктері бар», - деді Б. Қамалиев Үкімет үйінде өткен брифингте.

Оның айтуынша, бүгін Үкіметте маска шығаратын компания өкілдерімен жиналыс өтеді.

«Сонымен бірге, «Dolce» компаниясында шикізаттың жетіспеушілігі мәселесі көтерілген болатын. Оның себебі, Қытай Халық Республикасы маска шикізатының 50 пайызын маскамен қайтару жөнінде талап қойған болатын. Бұл жөнінен керекті құжаттар Денсаулық сақтау министрлігі арқылы жасалып жіберілді. Сондықтан, бүгін сағат 12-де Үкіметте вице-премьер Роман Склярдың жетекшілігімен тағы жиналыс жасаймыз. Оған медициналық маска шығаратын компания өкілдері келеді. Олардың қанша шикізаты қалғанын, қанша маска шығара алатынын анықтаймыз. Біздегі ақпарат бойынша, отандық кәсіпорындарда жыл аяғына дейін керекті шикізат бар. Бұл мәселені Үкіметтің бақылауында ұстап отырмыз», - деді вице-министр.

Айта кетейік, бүгін ҚР Премьер-Министрі Асқар Мамин коронавирус инфекциясының алдын алу мақсатында министрліктерге бірқатар тапсырма берді.