Қазақстандағы уран қоры қанша

АСТАНА. ҚазАқпарат – «ҚазАтомӨнеркәсіп» ұлттық атом компаниясы» акционерлік қоғамының коммерция жөніндегі бас директоры Асқар Батырбаев Ресейде өтіп жатқан «АТОМЭКСПО-2022» атты халықаралық форумда Қазақстан ураны экологиялық тұрғыда таза технологиямен өндіріліп жатқанын айтты, деп хабарлайды ҚазАқпарат тілшісі.

«Уранға сұраныс артатынын, көптеген реактордың құрылысы жоспарланғанын ескерсек, «ҚазАтомӨнеркәсіп» компаниясы қол қусырып отырмайды. Біз кейінгі 10 жылдағы ең ірі өндіруші болып есептелеміз. Бізде экологиялық тұрғыда ең таза технология қолданылады – жерасты ұңғымасында шаю тәсілі», - деді Асқар Батырбаев.

Компания өкілі елдегі барланған уранның қоры туралы мәлімет келтірді.

«Қазақстанға әлемдегі уранның 12 пайызы тиесілі. Бұл көрсеткіш бойынша ол әлемде екінші орында. Барланған уранның көлемі - 625 мың тонна, ал жалпы қор - шамамен 785 мың тоннадай. Қазіргі өндіріс қарқыны сақталса, бұл қор уран өндірісінің көлемін 2021 жылғы деңгейде 30 жыл бойы сақтап тұруға жетеді», - деп атап өтті «ҚазАтомӨнеркәсіп» өкілі.

Асқар Батырбаев Ресей Федерациясының Сочи қаласында өтіп жатқан «АТОМЭКСПО-2022» халықаралық форумында онлайн-көрсетілім арқылы сөз сөйледі.