Қазақстандағы ең ұзын полицей: Бойымның ұзындығы жұмысыма көмектеседі
2022 жылғы 23 маусым 09:03

Қазақстандағы ең ұзын полицей: Бойымның ұзындығы жұмысыма көмектеседі

ОРАЛ. ҚазАқпарат – Қазақстандағы ең бойы ұзын полиция қызметкері Орал қаласында тұрады. Төл мерекесіне орай Батыс Қазақстан облысы Полиция департаменті патрульдік полиция батальонының инспекторы, полиция капитаны Абай Балабаевпен ҚазАқпарат тілшісі әңгімелескен еді.

-Абай Аяпбергенұлы, кәсіби мерекең құтты болсын, алдымен өз өмірің туралы айтып берсең?

-Мен 1993 жылы 24 қарашада Алматы қаласында өмір есігін аштым. Кейін әкем Аяпберген Балабайұлы Исқақов Оралдан болғаннан кейін осында көшіп келдік. Әкем кәсіпкер болса, анам Гүлмира Қазақбайқызы «Қазпошта» АҚ бөлімшесінде аға кассир ретінде қызмет етеді. 2012 жылы Ақтөбе заң институтына оқуға түсіп, 2016 жылы тәмамдадым. Сол жылдан бастап Орал қаласында учаскелік полиция инспекторы қызметін атқардым. Өткен жылдың қыркүйегінде патрульдік полиция батальонына ауыстым. Бұдан он жыл бұрын бойым 193 сантиметр болса, қазір 207 сантиметрге жетті. Аяқкиім өлшемі – 45. Сондықтан киімді арнайы тапсырыс бойынша тіктіруге тура келеді. Үйленіп, отау құрғанмын, жолдасым, екі балам бар.

-Бойдың ұзындығы қызметіңе кедергі келтірмей ме?

-Жоқ, келтірмейді, қайта көмектеседі деп айтар едім. Мысалы, бұрын құқық бұзушыларды ұстау кезінде олар бойдың ұзындығынан да сескенеді.

Бірде мынадай оқиға болды. 2020 жылы болуы керек, анасы кішкентай қызымен дүкенге кеткен. Анасымен сөзге келді ме екен, кәмелетке толмаған үлкен қызы пәтерді ішінен кілттеп, есікті ашпай қойған. Пәтер екінші қабатта екен. Шақырту бойынша келген мен жертөленің төбесіне шығып, одан балконға өтіп, ішке кірдім. Қыз жылап отыр екен. Сосын психологты шақырдық. Әйтеуір жасөспірім қыз зардап шеккен жоқ. Міне, мен бойымның ұзындығынан пайданы сонда көргенмін.

Кейде жұмыс бабымен кездескен адамдар таңғалады. Әсіресе, балалар ата-аналарына: «Бойы ұзын полицейді қара!» деп айтып жатады. Күлемін де қоямын.

-Абай, спортпен де айналысатын шығарсың?

-Иә, волейболмен, таеквондомен айналыстым. Полицей болғаннан кейін денеңді шынықтырып, әр кезде бабыңда жүрген маңызды.

-Әңгімеңе рахмет. Қызметіңе табыс тілеймін.

Еске сала кетейік, бұдан бұрын бойы 2 метр сарбаздардың Қызылорда, Талдықорған, Алматыда әскери борышын өтеп жүргенін жазған болатынбыз.




Ұқсас жаңалықтар
Нұр-Сұлтан қаласының полицейлері «Абай күнін» атап өтті
2022 жылғы 10 тамыз 13:24

Нұр-Сұлтан қаласының полицейлері «Абай күнін» атап өтті

НҰР-СҰЛТАН. ҚазАқпарат - 2020 жылы Қазақстан Республикасы Үкіметінің қаулысымен 10 тамыз еліміздің мерекелік күнтізбесіне «Абай күні» болып бекітілді.

Мерейлі мереке аясында Нұр-Сұлтан қаласының Полиция департаменті ұлы Абайдың 177 жылдығына арналған бірқатар іс-шараларды ұйымдастырды, деп хабарлайды ҚазАқпарат Нұр-Сұлтан қалалық Полиция департаментінің баспасөз қызметіне сілтеме жасап.

Осыған орай, департаментте Абайдың асыл мұрасын насихаттайтын «Тұлғаға тағзым» атты кітап көрме қойылды.

Көрме барысында жас қызметкерлер ғұлама ақынның, абайтанушылардың, зерттеушілірдің еңбектерімен танысу мүмкіндігіне ие болды.

Сондай-ақ, департаменттің ведомствалық музей басшысы, тарих ғылымдарының магистрі Шынар Нұржанқызы Уайсова жеке құрам арасында Абай Құнанбайұлының өмірін насихаттау, ақынның шығармашылығы арқылы мақтаныш сезімін, патриоттық рухты тәрбиелеу бойынша дәріс өткізді.

Дәрістің мақсаты – Ұлы Абай мұрасының қазақ руханиятында алар орны, ұрпақ тәрбиесіндегі маңызы мен оның құндылығы, ұлттық идеологияны қалыптастырудағы рөлі жөнінде кеңінен ақпарат беру, сол арқылы тәртіп сақшыларының патриоттық, ерлік, жігерлік сезімдерін нығайту болып табылады.

Іс-шара барысында полицейлер ғұлама ақынның шығармашылық мұрасымен, абайтанушылардың зерттеулерімен тереңірек танысып, күнделікті қарбалас жұмыстарынан бір уақыт алшақтап, пайдалы мағлұмат алды.


Полиция Ұзынағаш ауылындағы кісі өліміне қатысы болуы мүмкін күдіктілерге іздеу жариялады
2022 жылғы 10 тамыз 13:12

Полиция Ұзынағаш ауылындағы кісі өліміне қатысы болуы мүмкін күдіктілерге іздеу жариялады

ҚОНАЕВ. ҚазАқпарат - Алматы облысы Жамбыл ауданы Ұзынағаш ауылында адам өліміне қатысы бар күдіктілерге полиция іздеу жариялады, - деп хабарлайды ҚазАқпарат тілшісі.

Алматы облыстық полиция департаменті баспасөз қызметінің мәліметінше, күдіктілер ұсталған сәтте сот санкциясымен бірден қамауға алынады. Қазір құзырлы орган төрт адамға іздеу жариялады.

1. Қозыбаев Ғани Мұратұлы 1991 жылы 3 қарашада туған. Оған 99 баптың (Адам өлтіу) 2 бөлігі 1,7,9 тармағы және 293 баптың 2 бөлігі 3 тармағында (Қаруды қолдану арқылы бұзақылық жасау) көрсетілген қылмысты жасады деген күдік келтіріліп отыр.

2. Тыныштықов Асқар Жаныбекұлы 1992 жылы 5 қыркүйекте дүниеге келген. Оған «Адам өлтіруге» оқталу бабы және 293 баптың 2 бөлігі 3 тармағында (Қаруды қолдану арқылы бұзақылық жасау) көрсетілген қылмысты жасады деген күдік келтірілді.

3. Шокенов Серікбола Мұратбеков 1992 жылы 1 қаңтарда туған. Ол 293 баптың 2 бөлігі 3 тармағында (Қаруды қолдану арқылы бұзақылық жасау) көрсетілген қылмысты жасады деген күдікке алынып отыр.

4. Аукенов Нұрсұлтан Бақтиярұлы 1992 жылы 25 қарашада дүниеге келген. Ол 293 баптың 2 бөлігі 3 тармағында (Қаруды қолдану арқылы бұзақылық жасау) көрсетілген қылмысты жасады деген күдікке алынып отыр.

Полиция күдіктілер жайлы ақпарат білетіндер төмендегі номерге хабарласуды сұрайды.

+7 701 500 08 47, +7 700 200 07 88, +7 702 717 77 17, +7 707 738 78 78, +7 72770 2 26 02 немесе 102.


Қылмыстық топ Шығыс Қазақстан мен Алматы облыстарында есірткі сатып келген
2022 жылғы 10 тамыз 04:09

Қылмыстық топ Шығыс Қазақстан мен Алматы облыстарында есірткі сатып келген

ӨСКЕМЕН. ҚазАқпарат – Шығыс Қазақстан мен Алматы облыстарында есірткі саудасымен айналысқан 6 адам сотталды, деп хабарлайды ҚазАқпарат тілшісі.

ШҚО полиция департаменті баспасөз қызметінің мәліметіне сүйенсек, өткен жылдың жазында полицейлер Шығыс Қазақстан мен Алматы облысындағы ірі есірткі арнасының жолын кесу бойынша кең ауқымды арнайы операция жүргізді.

Бір ай ішінде қылмыстық топтың барлық алты мүшесі ұсталды. Қазіргі уақытта сот үкімімен олар 10 жылдан астам мерзімге бас бостандығынан айырылды.

«Қылмыскерлер әрдайым жалдамалы пәтерлерді ауыстырып отырған. Есірткі саудасымен айналысқан топтың әр мүшесінде өзіне жүктелген міндеті болды. Мәселен, біреу жеткізу үшін жауап берсе, енді бірі есірткінің дозасын өлшеп, кейіннен қала бойынша арнайы орындарға жасырып кетіп жүрді. Тінту барысында сатуға дайын шамамен 10 келі синтетикалық есірткі тәркіленді. Бұл шамамен 100 000 бірреттік дозаға тең», - делінген ақпаратта.

Енді олардың барлығы қауіпсіздігі орташа және жоғары түзету мекемелерінде өз жазаларын өтейтін болады.


Jańalyqtar

Үрдіс

MURAǴAT