Қазақстандағы бірқатар әскери қызметші жемқорлық күдігіне ілінді

НҰР-СҰЛТАН. ҚазАқпарат – Еліміздің бірқатар өңіріндегі әскери қызметшілер сыбайлас жемқорлық қылмыстары күдігіне ілінді. Бұл туралы ҚазАқпарат Агенттіктің баспасөз қызметіне сілтеме жасап хабарлайды.

Жамбыл облысының Сыбайлас жемқорлық қызметі майор, Т.Рысқұлов ауданының қорғаныс істері жөніндегі бөлімнің басшысына қатысты тергеуді жүргізуде. Ол әскери есепте тұру туралы анықтама және шекті жасқа жету бойынша әскер билет беруде ықпал еткені үшін азаматтан 35 мың теңге көлемінде пара алғаны үшін күдіктелуде.

Күдікті мен оның қорғаушысының жеделдетілген сотқа дейінгі тергеу туралы ұсынымына және келу туралы міндеттемесін беруіне байланысты оған қатысты процессуалдық ұстау қолданылған жоқ.

Күдікті кінәсінің деңгейін анықтай отырып, оған қатысты соңғы шешімді сот шығарады.

Ағымдағы жылдың 20 қарашасында Шымкент гарнизонының әскер сотымен алаяқтық жасағаны үшін Түркістан облысы Отырар ауданының қорғаныс істері жөніндегі бөлімі жасақтау бөлімшесінің басшысы, капитан Б.Алиев өмір бойы мемлекеттік қызметте лауазым атқару құқығынан, әскери шенінен айыра отырып, 800 мың теңге айыппұл төлеу жазасымен сотталды.

Ол алдау және сенімді асыра пайдалану арқылы азаматтың ұлын ҚР Қарулы күштеріндегі қызметін кейінге шегергені үшін 80 мың теңге көлемінде қаражатын иемденгені үшін күдікті болған.