Қазақстанда жыл сайын 1,5 млн. адам асқазан-ішек ауруларына тап болады
2015 жылғы 30 қыркүйек 16:38

Қазақстанда жыл сайын 1,5 млн. адам асқазан-ішек ауруларына тап болады

АЛМАТЫ. ҚазАқпарат - Қазақстанда жыл сайын 1,5 млн адам асқазан-ішек ауруларына тап болады. Бұл туралы бүгін Алматыда өткен «Орталық Азия гастроэнтеролгия апталығы -2015» конгресі барысында ҚР Денсаулық сақтау және әлеуметтік даму министрлігінің бас гепатологы Күлпәш Қалиасқарова мәлімдеді.

Конгресс барысында асқазан-ішек жолдары ауруларын, бауыр дерттерін емдеудің озық тәжірибелері жинақталып, жарияланды. Әлемнің 24 елінен келген 95 лектор өз елдеріндегі емдеу жүйесінің үздік жетістіктерімен бөлісті.

«2015 жылдың басында асқазан-ішек жолдары ауруларымен ауыратын 1,5 млн. адам тіркелді. Жылдан жылға бұл көрсеткіш артып келеді. Бұл ең алдымен, диагностика жүйесінің жақсаруымен байланысты. Асқазан ауруларының қозуына күйзеліс, уақтылы тамақтанбау, фаст-фудпен қоректену әсер етеді. Сондай-ақ, қосымша дәрі ішу, биологиялық белсенді заттарды пайдалану бауыр ауруының қозуына әкеледі. Жыл сайын Қазақстанда бауыр циррозімен ауыратын науқастарды вирусқа қарсы препараттармен қамту үшін 4 млрд теңге бөлінеді», - деді ол.

Мамандардың айтуынша, гастроэнтерология саласында жыл сайын түрлі ғылыми ашылулар болып тұрады. Ашылған жаңалықтардың 20 пайызы жыл сайын жаңарып тұрады.

«Сондықтан, мұндай конференцияларды өткізу өте маңызды. Біздің қазіргі пайдаланып отырған препараттармыз бір жылдан ескіріп қалуы ғажап емес. Сондықтан, одан да тиімді болатын дәрі-дәрмектерді пайдаланып, халыққа жеткізуіміз керек», - деді медицина ғылымдарының докторы, профессор Александр Нерсесов.

Jańalyqtar

MURAǴAT