Қазақстанда ЖОО-ның үздік оқытушысы анықталады

НҰР-СҰЛТАН. ҚазАқпарат – ҚР Білім және ғылым министрлігі жоғары оқу орнының үздік оқытушысын анықтайтын болады, деп хабарлайды ҚазАқпарат ведомствоның баспасөз қызметіне сілтеме жасап.

«Жоғары оқу орнының үздік оқытушысы - 2021» республикалық байқауына қатысу үшін құжаттарды қабылдау 1 қарашадан басталып, 15 қарашаға дейін жалғасады. Жеңімпаз 6 миллион теңге шамасында сыйақы алады.

Байқауға жоғары оқу орындарының штаттағы оқытушылары қатыса алады. Олардың үздіксіз ғылыми-педагогикалық өтілі кемінде 5 жыл болып, оқытушылық және ғылыми қызметте жоғары жетістіктері болуы тиіс.

Байқаудың мақсаты – оқытушы мамандығының беделін арттыру және жоғары оқу орындары оқытушыларын кәсіби тұрғыда одан әрі дамуына ынталандыру.

Конкурс 2 кезеңнен тұрады. Алдымен, жоғары оқу орнының ішінде, кейін республикалық деңгейде өтеді. Конкурсқа қатысу үшін өтінімдер мен құжаттар ҚР БҒМ universitycontest.iac.kz ақпараттық жүйесі арқылы электрондық форматта қабылданады.

«Жоғары оқу орындарының қызметкерлері мен профессорлық-оқытушылар құрамынан тұратын сарапшылар тобы келіп түскен барлық құжатты тексереді. Сараптау тобының қорытындысы негізінде ЖОО комиссиясы конкурсқа қатысушылардың екінші республикалық кезеңге қатысуы туралы шешім шығарады. Республикалық деңгейде құрылған комиссия құрамына үкіметтік емес ұйымдардың, БАҚ, студенттік және жастар ұйымдарының, ЖОО қауымдастықтарының өкілдері мен сарапшылар енді», – деді ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев.

Айта кетейік, «Жоғары оқу орнының үздік оқытушысы» байқауының жеңімпаздары ақшалай ынталандырумен қатар төсбелгіге ие болады.

Байқау ақпараттық жүйе базасында өтеді, сәйкесінше конкурсқа қатысушылар барлық кезеңнің ашық өтуін бақылай алады.