Қазақстанда темекі қымбаттайды
2022 жылғы 19 мамыр 12:01

Қазақстанда темекі қымбаттайды

НҰР-СҰЛТАН. ҚазАқпарат – Алдағы жылдары акциздердің көтерілуіне орай темекі бағасы өседі. Бұл туралы ҚР Премьер-Министрінің орынбасары – Қаржы министрі Ерұлан Жамаубаев мәлім етті, деп хабарлайды ҚазАқпарат тілшісі.

Бүгін Сенатта тілшілер Қаржы министріне темекіге және құрамында қанты бар сусындарға акциздер енгізуге қатысты сұрақ қойды.

«2024 жылға дейін темекіге акциз мөлшерлемесін 35 еуроға көтеруді жоспарлап отырмыз. Яғни мың дана темекіге шамамен 16 мың теңге болады. Бұл ретте есептеп көрсек, бір қорап темекі 300-350 теңгеге дейін қымбаттауы мүмкін», - деді Ерұлан Жамаубаев.

Бұдан бөлек ол құрамында қанты бар сусындарға қатысты Үкімет деңгейінде талқылау жүріп жатқанын айтты.

«Осы орайда талқылаулар қорытындысы бойынша тиісті мәліметті жариялап, Парламентке келеміз. Біз үшін тиісті теңгерімді сақтау керек, яғни ұлт денсаулығы басты мәселе болып саналады. Сонымен қатар, кәсіпорындар да зардап шекпеуі керек, бұл кәсіппен шағын және орта бизнес айналысады. Сондықтан осының барлығын егжей-тегжейлі пысықтаймыз», - деді Ерұлан Жамаубаев.

Бұдан бұрын хабарланғандай, темекі бойынша келісім ратификацияланған және 2024 жылға қарай мың дана темекіге акциз теңгелік мәнде 35 евроға дейін артады.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT