Қазақстанда спорт төрешілерінің жалақысы қаншалықты өсті
2022 жылғы 1 шілде 21:29

Қазақстанда спорт төрешілерінің жалақысы қаншалықты өсті

ТҮРКІСТАН. ҚазАқпарат - Бүгін Мәдениет және спорт министрі Дәурен Абаев Түркістан облысының тұрғындарымен кездесті. Жиынға қатысушылар өңірдегі мәдениет нысандарын қайта құру, туризм мен бұқаралық спортты дамытуға қатысты сұрақтар қойды, деп хабарлайды ҚазАқпарат.

«Біздің бүгінгі кездесуіміз-демократияландырудың, бүкіл мемлекеттік биліктің транспаренттілігін арттырудың және атқарушы органдардың жауапкершілігінің тағы бір дәлелі. Мемлекет басшысы Қасым-Жомарт Тоқаевтың тапсырмасы бойынша халықпен тұрақты кездесулер «Жаңа Қазақстан» жақсы белгісі болуы тиіс деп санаймын», – деді министр.

Кездесу барысында Дәурен Абаев соңғы 3 жылда Түркістан облысының туризм саласына инвестиция көлемі 255,8 млрд теңгеге жеткенін атап өтті.

«Қысқа мерзім ішінде облыста 40-тан астам жаңа қонақ үй мен 30-ға жуық мәдени нысан іске қосылып туристерге қызмет көрсетіп отыр. Олардың бірегейі – «Керуен сарай» көпфункционалды туристік кешені. Бұл объект өңірдің экономикасын дамытуға елеулі үлес қосуда. Жаңа 600 жұмыс орынымен қамтамасыз етіп, 208 млн АҚШ доллары көлемінде инвестиция тартып отыр. Бүгінгі таңда облыс аумағында жалпы сомасы 86,9 млрд теңгені құрайтын 35 туристік инвестициялық жоба жүзеге асып жатыр», – деді министр.

Сондай-ақ, министрлік басшысы Түркістан облысында 685 мәдениет мекемесі жұмыс істейтінін хабарлады.

Осы жылы өңірде 3 нысанның құрылысы және 14 мәдениет нысанының жөндеу жұмыстары, сондай-ақ мемлекеттік тілде зағип және нашар көретін азаматтар үшін кітапхана қорын ұлғайту жоспарланған.

Кездесуде Дәурен Абаев басым міндеттердің бірі - бұқаралық спортты дамыту екенін атап өтті.

Осы мақсатта Түркістан облысында 5 жаңа нысан салу және 1 спорт нысанын қайта жаңарту көзделген.

Сонымен қатар, министрлік жұмысының маңызды бағыты - спорт төрешілерінің еңбекақысын арттыру.

«Біз спорт төрешілерінің еңбекақысын көтеруге бастамашы болдық. Үлкен жұмыс атқарылды. Бұл көптеген судьялар үшін қосымша мотивация болады және мамандықтың беделін арттыруға, жаңа мамандардың келуіне ықпал етеді. Сайып келгенде, барлығы: спортшылар, жанкүйерлер және жалпы сала жеңетініне сенімдімін. Жарыстар да сапалы жаңа деңгейге шығуы керек екені анық. Осылайша, 2024 жылға қарай спорт төрешілерінің жұмысына ақы төлеу БЛЕ-дан 100% дейін ұлғаяды. Бұл мәселе ұзақ уақыт бойы шешілмей келді», - деді министр Дәурен Абаев.

Сонымен, халықаралық санаттағы ұлттық судьялардың базалық лауазымдық еңбекақысы 2654,6 теңгеден 17697 теңгеге дейін, жоғары санаттағы ұлттық судьялардың еңбекақысы 2123,6 теңгеден 15927 теңгеге дейін, жоғары санаттағы ұлттық судьялардың еңбекақысы 2123,6 теңгеден 15927 теңгеге дейін, спорт бойынша ұлттық судьялардың еңбекақысы 1769,7 теңгеден 14158 теңгеге дейін, 1 категориялы судьялардың еңбекақысы 1415,8 теңгеден 12388 теңгеге дейін, спорт төрешілерінің еңбекақысы - 1238,8 теңгеден 10618 теңгеге дейін ұлғаяды.

Бұл - төрешілерге жарыстың бірінші күнінде төрелік еткені үшін төленетін төлем.

Егер жарыс бірнеше күнге созылса, бұл төлем жарыс күндерінің санына көбейтіледі. Айта кету керек, бұл еңбекақы емес.

Кездесу барысында министр барлық қойылған сұрақтарға жауап берді, сондай-ақ БАҚ үшін брифинг және азаматтарды жеке қабылдау өткізді.

Сондай-ақ Дәурен Абаев облыстың бірқатар мәдени-тарихи, спорттық және туристік нысандарын аралады.


Фото: gov.kz
Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT