Қазақстанда өтетін бизнес-форумға Корея президенті қатысады

НҰР-СҰЛТАН. ҚазАқпарат - Елордада Корея Республикасының Президенті Мун Чже Иннің Қазақстанға мемлекеттік сапары аясында Қазақстан-Корея бизнес-форумы өтеді, деп хабарлайды ҚазАқпарат «Атамекен» ұлттық кәсіпкерлік палатасының Қоғаммен байланыс департаментіне сілтеме жасап.

Департамент таратқан мәліметтерге қарағанда, форум жұмысына ұлттық компаниялар, экономиканың түрлі секторындағы қазақстандық және кореялық ірі бизнес өкілдері қатысады деп күтілуде.

«Корея бизнес-ортасының қызығушылығын есепке ала отырып, бұл іс-шара Қазақстан Республикасының экспорттық әлеуетін арттыру, екі ел арасындағы кәсіпкерлердің тәжірибе алмасуы, іскерлік байланысты кеңейту, сондай-ақ, экономиканың түрлі салаларында екіжақты ынтымақтастықты дамытуға арналған платформаға айналдыру жоспарланып отыр»,-делінген хабарламада.