Қазақстанда лифт мәселесі қалай шешіледі

None
None
НҰР-СҰЛТАН. ҚазАқпарат - Қазақстанда лифт саласын дамытудың жол картасы әзірленді, онда саланың проблемаларын шешу үшін нақты шаралар көзделген. Бұл туралы ҚР Индустрия және инфрақұрылымдық даму министрі Бейбіт Атамқұлов ҚР Парламенті Мәжілісінің пленарлық отырысында депутаттық сауалға жауап бере отырып атап өтті, деп хабарлайды ҚазАқпарат.

Бұл бағытта ҚР Заңының 2 жобасы көмектеседі: ТКШ мәселелері бойынша және өнеркәсіптік қауіпсіздік мәселелері бойынша. Сондай-ақ ҚР Индустрия және инфрақұрылымдық даму министрлігі әзірлеген Лифт шаруашылығын дамытудың жол картасы да бар.

«ТКШ туралы ҚР Заңының жобасында норма қарастырылған, оны қабылдағаннан кейін ұлттық стандарт нарықтың барлық субъектілерінің орындауы үшін міндетті болады. Сонымен қатар, жергілікті атқарушы органдардың мамандары – әлеуметтік инфрақұрылым объектілеріндегі өнеркәсіптік қауіпсіздік саласындағы қадағалау жөніндегі мемлекеттік инспектор мәртебесіне ие болады», - деді министр.

Бұдан басқа, лифт жабдығына техникалық қызмет көрсету бойынша қызметтер нарығын реттеу мақсатында жаңа рұқсат беру рәсімі – лифт жабдығын монтаждау, техникалық қызмет көрсету, техникалық диагностикалау, техникалық куәландыру және жөндеу жүргізу құқығына аттестаттау енгізіледі. Қарастырылған өнеркәсіптік қауіпсіздік туралы заң бойынша, уәкілетті орган құзыретіне лифт құрал-жабдықтарына қызметтер көрсететін заңды тұлғаларды қадағалау жөнінде өкілеттілік беріледі. Осы құжаттарды қабылдағаннан кейін лифт қауымдастықтарымен бірлесіп аталған жұмыс түрлерін орындау бойынша қызмет көрсететін заңды тұлғаларға қойылатын біліктілік талаптары әзірленетін болады.

Сонымен қатар, ҚР ИИДМ лифт саласын дамытудың жол картасын әзірледі, онда саланың проблемаларын шешу үшін нақты шаралар көзделген. Қазіргі уақытта елімізде 24025 лифті пайдаланылуда, олардың 6 мыңнан астамы жөндеуді және ауыстыруды қажет етеді. Өз қызметін жылына 3150 лифтінің жалпы өндірістік қуаты бар 6 кәсіпорын жүзеге асырады.

Айта кету керек, 2018 жылы министрлік «Қазақстан лифт одағы» қауымдастығымен бірлесіп, бірыңғай «Лифтілер, эскалаторлар, траволаторлар және мүмкіндігі шектеулі адамдарға арналған көтергіштер» ҚР СТ Ұлттық стандартын әзірлеп, енгізді. Бұл құжатпен лифт жабдықтарын монтаждау, техникалық қызмет көрсету бойынша қызмет көрсететін лифт ұйымдарына қойылатын талаптар анықталды.

Соңғы жаңалықтар