Қазақстанда қанша адам баспанаға мұқтаж
Жиында Мәжіліс депутаты Омархан Өксікбаев вице-министрден Қазақстанда қанша адам тұрғын үйге мұқтаж екендігін сұраған болатын.
«Баспанаға мұқтаж әр адамға дейін нақты білеміз. Жергілікті атқарушы органдардың мәліметіне сәйкес, бүгінгі күні 465 091 адам пәтер кезегінде тұр. Мәселен, Ақмола облысында 21 681, Ақтөбе облысында 27 796 адам бар. Оның ішінде мүгедектігі немесе әлеуметтік жағдайының төмендігі бойынша тіркелгендер туралы да нақты мәлімет қолымызда», - деп жауап берді вице-министр.
Дегенмен, оның айтуынша, баспанаға мұқтаж ретінде тізімде тұрған адамдарға қатысты мәселелер де бар. Олардың кейбірінде, нақты айтқанда 35 094 адамның ЖСН 2-3 рет тіркелген. Бұған қоса, 96 581 адам пәтер алып үлгерген.
«Ал Тұрғын үй құрылыс жинақ банкі» салымшыларының саны - 1 млн 96 мың адам. Олар да кезекте тұрған соң пәтерге мұқтаждар қатарына жатқызып отырмыз. Мұнан бөлек, 1 миллионнан астам адам жер учаскесін талап етуде. Оларды да есепке алдық. Сонда 2,5 млн адам пәтерге мұқтаж болып шығады. Ал оларды қалай баспанамен қамтамасыз етеміз дегенге келсек, «Нұрлы жер» бағдарламасы аясында 15 жыл ішінде 1,5 млн пәтер саламыз деген жоспарымыз бар», - деді Қайырбек Өскенбаев.