Қазақстанда автомобиль жасау көрсеткіштері 40% артты
Бұл туралы ҚР Ұлттық экономика министрі Әлібек Қуантыров Үкімет отырысында баяндады.
«Өңдеу өнеркәсібінде оң өсу сақталып отыр. Өндіріс көлемі 3,5% өсті. Көрсеткіштің өсуі 15 өңірде тіркелді. Соның ішінде ең жоғарғы өсуді Батыс Қазақстан, Қостанай, Абай облыстары және Алматы қаласы көрсетті. Салалар бойынша машина жасау өндірісінің 28,8%-ке, оның ішінде автомобиль жасаудың – 40,1% және электр жабдықтарын жасаудың – 34,9% өсуі тіркелді», - деді Ұлттық экономика министрі.
Сондай-ақ, азық-түлік өндірісі – 5,3%, мұнай өңдеу өнімдері – 1,9%, құрылыс материалдары – 4,4%, сусындар өндірісі – 6,6%, пластмасса бұйымдары – 7,8%, жеңіл өнеркәсібі – 24% өсті.
Тау-кен өнеркәсібіндегі өндіріс көлемі 3,7% жоғарлады. Бұл ретте мұнай өндіру – 5,6%, газ өндіру – 2,5%, өзге де пайдалы қазбаларды өндіру – 17,4%, тау-кен өнеркәсібінде қызмет көрсету – 3,2% өсті. Металл кендерін өндіру – 0,2%, көмір өндіру – 8,1% төмендеді.
Орындалған құрылыс жұмыстарының көлемі 12,3% ұлғайды. 19 өңірде оң өсу тіркелді, әсіресе құрылыс-монтаждау жұмыстарының ең көп өсуі Жетісу, Абай, Қызылорда және Жамбыл облыстарында байқалды.
«Биылғы қаңтар-маусымда 7,4 млн шаршы метр тұрғын үй пайдалануға берілді, бұл өткен жылдың сәйкес кезеңімен салыстырғанда 11,8%-ке жоғары. Тұрғын үйді пайдалануға берудің ең жоғары көрсеткіштері Алматы, Шымкент қалаларында, сондай-ақ Ұлытау және Абай облыстарында байқалды», - деді Әлібек Қуантыров.