Қазақстанда алғаш рет 1-11 сыныптарға арналған қазақ тілінің деңгейлік оқулықтары шығарылды - БҒМ
«Көптілділік білім беру моделі қалыптасты. Қазақ, орыс және ағылшын тілдеріне оқыту үлгісі білімнің аралық деңгейлерін қамтитын болады. Осыған орай, алғаш рет Қазақстанда 1-11 сыныптарға арналған қазақ тілінің деңгейлік оқулықтары дайындалып отыр. Жаңа оқулықты біз бүгін депутаттарға да таратып бердік, бұл жаңа әдістеме бойынша әзірленген баламасы жоқ оқулықтар», - дейді министр. Оның айтуынша, әр сыныпқа арналған әдістемелік жиынтық оқулықтан, мұғалімнің әдістемелік құралынан, жұмыс дәптерлерінен, дидактикалық материалдар жинағы мен сөздіктен тұрады. Сонымен қатар оқулық салмағын азайту мақсатында 1-2 сынып оқушылары үшiн әр тоқсанға бөлек жұмыс дәптерiнiң төрт түрi енгізілген. Ал 3-4 сыныптарда жұмыс дәптерiнiң екі түрi болады. «Бүгінгі күні осы оқулықтардың және олардың жиынтықтарының макеттері республикалық ғылыми-тәжірибелік орталықта сараптамадан өтуде. Біз осы оқулықтарды алдағы қыркүйекте сынақтан өткiзудi жоспарлаймыз. Содан кейін бiр жыл iшiнде барлық кемшіліктер жойылғаннан кейiн, біз бүкiл мектептердің 1-11 сыныптарында оқулықтарды деңгейлiк оқулықтарға алмастыруды жоспарлаймыз. Айта кетерлігі, бүгінгі күні қазақ тiлi бойынша деңгейлiк оқу бағдарламасы бекітіліп, бiрақ оқулықтар басып шығарылмаған болатын. Осы мәселе қазір толығымен шешіліп отыр», - деді А.Сәрінжіпов. Оның сөзіне қарағанда, аталмыш деңгейлік жүйе оқушылардың мемлекеттік тілді меңгеруіне септігін тигізетін болады.