Қазақстанда 742 шақырым электр желісінің иесі жоқ
Еліміздің бас энергетигі иесіз желілерді қысқарту бойынша қыруар шаруа атқарылып жатқанын айта келе, энергия беруші ұйымдар саны 162-ден 152-ге азайтылғанын атады. Оның пікірінше, мұндай қадам саладағы қауіпсіздік деңгейін арттырып отыр.
«2018 жылы иесіз желілер ұзындығы 2 350 шақырым болса, 2019 жылдың басында бұл көрсеткіш 1 336 шақырымға азайды. Ал соңғы бес айдың ішінде 594 шақырым электр желісі жергілікті кәсіпорындар балансына беріліп, 742 шақырымы иесіз тұр», - дейді Қанат Бозымбаев.
Министр атаған қадамдардың нәтижесінде электр желісіндегі жазатайым оқиғалар азайған.
«Жалпы 2023 жылға қарай республика бойынша энергия беруші ұйымдар санын 110-ға дейін қысқарту көзделіп отыр. Ал иесіз желілер мен коммуналдық ұйымдар мүлде болмайды», - деді ол.
Қанат Бозымбаев электрмен жабдықтау жүйесінің қолжетімділігі бойынша Қазақстан Дүниежүзілік банктің «Doing Business» рейтингінде Қазақстан 76-шы орында тұрғанын айтты.
Айта кетейік, ел алдында есеп берген энергетика министрі Қанат Бозымбаев 2027 жылға дейін Қазақстанда электрге тапшылық болмайтынын айтқан болатын.