Қазақстан жаңа үлгідегі жолаушылар ұшағын бірінші болып сатып алды

АСТАНА. ҚазАқпарат - Астанаға Airbus A­320 ­NEO­ (­new engine option­) үлгідегі жаңа жолаушылар ұшағы жеткізілді. Аталған ұшақ ішкі рейстерді орындайды. Сондай-ақ Қытай, Түркия, Үндістан мен Біріккен Араб Әмірліктеріне ұшатын болады. ТМД мен Орталық Азия елдері ішінде Қазақстан аталған үлгідегі ұшақты бірінші болып сатып алды, деп xабарлайды ҚазАқпарат тілшісі.

Airbus A­320 ­NEO­ (­new engine option­) реактивті жолаушылар ұшағы санатына жатады. Онда 16 бизнес-класс және 132 эконом-класс орындары бар. Ұшақта Pratt & Whitne қозғалтқышы орнатылған. Соның арқасында ұшақ бұған дейінгі үлгілерге қарағанда жанар-жағар майды 15 пайызға аз жағады. Сөйтіп, ұшудың қашықтығын ұзартып отыр. Сыртқы дыбыстар да қатты естілмейді. Себебі A320NEO ұшағында дыбыс өткізу көрсеткіші ICAO талаптарынан 19 дБ-ге төмен. Салоны да кең. Ал жарық түсіру жүйесі диодты теxнологияға негізделген.

Айта кетейік, өткен жылы «Эйр Астана» компаниясы Airbus A320 NEO­ үлгідегі 11 жолаушылар ұшағын лизингпен сатып алу туралы келісімді рәсімдеген болатын. Бүгін таныстырылған Airbus - солардың бірі. Келесі жылдың басында тағы екі ұшақ жеткізіледі деген жоспар бар.