Қазақстан Тәжікстанға не үшін әскери мүлік береді
Қазақстан Үкіметі мен Тәжікстан Үкіметі арасындағы өтеусіз әскери-техникалық көмек көрсету туралы келісім 2021 жылғы 17 сәуірде Нұр-Сұлтан қаласында жасалған.
«Келісім тәжік тарапына әскери мүлікті, атап айтқанда, оқ-дәрілерді бір рет беруді көздейді. Қазақстан тарапы әскери мүлікті Жамбыл облысының Отар станциясынан Тәжікстан Республикасының аумағына дейін («Рохати» станциясы, Душанбе қаласы) теміржол көлігімен жеткізуді қамтамасыз етіп, оған байланысты барлық шығысты өзі көтереді», - деді ҚР Қорғаныс министрінің орынбасары Руслан Шпекбаев.
Оның айтуынша, Тәжікстан жағы Қазақстаннан алған әскери мүлікті, оны пайдалану құқығын үшінші тарапқа бермейді.
«Әскери мүлікті Тәжікстанға беру Қазақстанның жауынгерлік әзірлігі мен қоғаныс қабілетіне ықпал етпейтінін атап өту қажет», - деді Р. Шпекбаев.
Сонымен қатар, бүгін жалпы отырыста «Қазақстан Республикасының Үкіметі мен Тәжікстан Республикасының Үкіметі арасындағы тәжік-ауған шекарасына іргелес аудандарда қауіпсіздікті қамтамасыз етуде әскери-техникалық жәрдем көрсету туралы келісімді ратификациялау туралы» заң жобасы да мақұлданды.
Аталған келісім 2021 жылғы 12 шілдеде Нұр-Сұлтан қаласында жасалды.
«Келісімге сәйкес Тәжікстан тарапы Қазақстаннан берілетін әскери мүлікті тек тәжік-ауған шекарасына іргелес аудандарда қауіпсіздікті қамтамасыз ету мақсатында қолдануға және оларды үшінші тарапқа бермеуге міндеттенеді», - деді Руслан Шпекбаев.
Келісімге сәйкес Қазақстан тарапы Тәжікстан тарапына әскери мүлікті өтеусіз беру түрінде әскери-техникалық жәрдем көрсетеді.
Әскери мүліктің атауы мен көлемін Тараптардың уәкілетті органдары дипломатиялық арналар арқылы келіседі.