Қазақстан мен Грузия СІМ басшылары астанада келіссөз өткізді

НҰР-СҰЛТАН. ҚазАқпарат – Биылғы жарты жылда Қазақстан мен Грузия арасындағы сауда-саттық бес есеге артып, 150 млн АҚШ долларын құрады. Бұл туралы Қазақстан Республикасы Премьер-Министрінің орынбасары - Сыртқы істер министрі Мұхтар Тілеубердінің Грузия Сыртқы істер министрі Илья Дарчиашвилимен кездесуінде айтылды, деп хабарлайды ҚазАқпарат.

ҚР СІМ мәліметінше, кездесуде екі елдің сыртқы саяси ведомстволарының басшылары дипломатиялық қатынастардың орнағанына 30 жыл толуына орай құттықтаулармен алмасып, олардың достық пен өзара құрмет рухында қарышты дамып келе жатқанын атап өтті.

Министрлер Қазақстан-Грузия ынтымақтастығының негізгі бағыттары мен перспективаларын талқылады. Сондай-ақ халықаралық күн тәртібіндегі өзекті мәселелер де қаралды. Осы тұрғыда министрлер екі елдің халықаралық ұйымдар, соның ішінде БҰҰ және ЕҚЫҰ аясындағы өзара іс-қимыл деңгейін жоғары бағалады. Тараптар сауда қатынастарда елеулі әлеуеттің бар екенін растады және тауар айналымы көлемінің өсуіне, номенклатурасын әртараптандыруға серпін беру үшін нақты шаралар қабылдауға келісті. 2022 жылдың бірінші жартыcының қорытындысы бойынша 150 млн АҚШ долларына жеткен өзара сауданың бес есе өсуі – бұл одан әрі бірлескен жұмыс жолындағы маңызды мәренің бірі.

Көлік және коммуникация саласындағы ынтымақтастықты дамытуға ерекше назар аударылды. Сұхбаттастар Оңтүстік Кавказдағы басты қазақстандық активтер – Батуми мұнай терминалы мен портты пайдалана отырып, Транскаспий халықаралық көлік бағытын дамыту мәселелерін талқылады.

Бұдан бөлек, мәдени-гуманитария байланыстарын жандандырудың зор маңызы атап өтілді.

Еске салайық, бүгін Қазақстанға ресми сапармен Грузия Премьер-министрі Ираклий Гарибашвили келді.

Фото: gov.kz