Қазақстан Елшісі Рим Папасы Францискке сенім грамотасын табыс етті
«Елші Қазақстан Президенті Қасым-Жомарт Тоқаевтың жылы лебіздері мен ізгі тілектерін жеткізіп, еліміздің Қасиетті тақпен ынтымақтастықты нығайтуға дайын екендігін білдірді. Сонымен қатар Елші Қазақстан мен Ватикан арасындағы дипломатиялық қатынастың орнағанына 30 жылдығы қарсаңында Рим Папасының Әлемдік және дәстүрлі діндер лидерлерінің VII съезіне қатысуының тарихи маңыздылығын және 2023 жылғы қыркүйекте Астанада Понтификтің діни мессаны өткізуінің ауқымдылығын атап өтті», - делінген мәліметте.
Өз кезегінде Рим Папасы Франциск өзінің Қазақстанға сапарын және бейбітшілік пен диалог саясатын ілгерілету жөніндегі халықаралық бастаманы ұйымдастырғаны үшін ризашылығын білдірген. Понтификтің айтуынша, Қасиетті тақ өзінің миссиясына сәйкес әр адамның қол сұғылмайтын қадір-қасиетін қорғауға, ортақ игілікке ықпал етуге және барлық халықтар арасындағы адами бауырластықты нығайтуға тырысады.
Cонымен қатар Ватиканға сапар барысында Қ. Саржанов Қасиетті тақтың жоғарғы басшылығы – Ватикан мемлекеттік хатшысының орынбасары архиепископ Эдгар Паррамен, мемлекеттермен байланыс жөніндегі хатшы архиепископ Пол Галлахермен және Дінаралық диалог бойынша дикастерия префектісі – мұсылмандармен діни байланыстар жөніндегі комиссияның префектісі кардинал Мигель Анисо Гиксотпен жеке кездесулерді өткізген.
Олардың барысында екіжақты өзара іс-қимылдың өзекті мәселелері, оның ішінде медицина, ғылым және зерттеулер саласы, сондай-ақ адам құқықтары, ядролық қарусыздану және климаттың өзгеруі мәселелері талқыланды.