Қазақстан Елшісі Индонезия Президентіне сенім грамотасын тапсырды

ЖАКАРТА. ҚазАқпарат – Жакарта қаласындағы «Истана Мердека» Президент сарайында Қазақстан Республикасының Елшісі Данияр Сарекеновтің Индонезия Республикасының Президенті Жоко Видодоға сенім грамоталарын тапсыру шарасы өтті, деп хабарлайды ҚазАқпарат.

ҚР Сыртқы істер министрлігінен мәлім еткендей, рәсімнен кейін болған сұхбат барысында Елші Қазақстан Президенті Қасым-Жомарт Тоқаевтың құттықтауын жеткізді. Сондай-ақ ҚР Тұңғыш Президенті - Елбасы Нұрсұлтан Назарбаевтың бастамасымен «2050 Стратегиясы» шеңберінде Қазақстанда жүргізіліп жатқан реформалар туралы мәлімдеп, Оңтүстік-Шығыс Азиядағы ең ірі мемлекет және экономика болып табылатын Индонезиямен жан-жақты ынтымақтастықты дамытуға қызығушылығын растады.

«Индонезия Президенті Қазақстанның тәуелсіздік жылдары қол жеткізген жетістіктерін жоғары бағалап, астананы көшіру және Нұр-Сұлтанның дамуы жөніндегі қазақстандық тәжірибеге ерекше қызығушылық білдірді. Ж.Видодо Қазақстанмен ынтымақтастықты тереңдетуге мүдделілігін растады және Елшіге дипломатиялық миссиясында сәттілік тіледі. Өз кезегінде Д.Сарекенов екі ел арасындағы достық қатынастарды нығайтуға және оларды жаңа жоғары деңгейге шығаруға бар күшін салатынына сендірді», - делінген СІМ ақпаратында.