Қазақстан цифрландыруда ғажайып прогреске жетті – Азия даму банкінің президенті
Цифрлық байланыс – заманауи экономиканың дамуына ықпал ететін маңызды факторлардың бірі болып отыр. Бүгінгі таңда цифрлық технологияның арқасында адамдар қашықтан жұмыс істей алады, балалар үйден оқи алады, үйден шықпай-ақ дәрігерден кеңес алуға болады. Дегенмен, қазір цифрлық технологияларға қолжетімділік интернеті барлар мен жоқтар арасын алшақтатып, бөліп жіберді
, - деді Масацугу Асакава Астана халықаралық форумында.
АДБ президенті Қазақстанның цифрландыруда ғажайып прогреске жеткенін, аймақта интернеттің ену көрсеткіштері ең жоғары екенін атап өтті. Оған интернетке қосылудың салыстырмалы түрде төмен құны және цифрлық сауаттылықтың жоғарылауы негізгі фактор болған.
Интернеттің енуінің жоғары деңгейі Үкіметке мемлекеттік қызметтердің көпшілігін цифрландыруға мүмкіндік берді және 2025 жылға қарай мемлекеттік қызметтердің 100 пайызын е-үкімет мобильдік қосымшасымен қамту жоспарланғанына өте қуаныштымыз. Қазақстан осы прогреске сүйене отырып, экономика саласын цифрлық трансформациялау үшін технологияны пайдалануды кеңейту, цифрлық экономиканы дамытудағы серпіліс және алдағы төртінші өнеркәсіптік революцияға дайындық жұмыстарын жалғастыра алады
, - деді спикер.
Сонымен бірге М. Асакава өнеркәсіп секторларындағы цифрлық трансформация жұмыс орындарын құруды және еңбек өнімділігін арттыруды қамтамасыз ететінін, электрондық коммерция мен сауданың артуын ынталандыратынын айтты.
Дегенмен, мұнда мүмкіндіктер де, сын-қатерлер де бар. 2021 жылы Қазақстандағы инновацияның жай-күйіне жүргізген зерттеуіміз қызықты сәттерді анықтады.
Біріншіден, тұтастай алғанда кәсіпорындарды цифрландыру процесіне басшылықты қамтамасыз етуде Үкіметке шешуші рөл беріледі. Менің білуімше, қазір 4 министрлік электр, су және жылыту үшін ақылды есептегіштерді енгізуде. Осыны ескере отырып, ұлттық стандарттар әзірленіп жатқан кезде «ақылды» есептегіштерді стандарттауды үйлестіру мүмкіндігі бар.
Тағы бір міндет – энергетикалық секторда цифрлық технологияларды қолдануды кеңейтуге және Үкіметтің электр желілеріндегі қуат шығынын азайтуға күш салуына және 2060 жылға дейінгі декарбонизация стратегиясының өршіл мақсаттарына жетуге қатысты. Егер интеллектуалды және энергетикалық жүйені, былайша айтқанда «ақылды» электр желілерін құруда көшбасшылық көрсетілмесе жоғарыда аталған мақсаттарға қатер төнуі ықтимал
, - деді Масацугу Асакава.
Сонымен бірге, спикер Қазақстанның бәсекеге қабілетті, әртараптандырылған, ғылыммен қамтылған экономикаға көшуін қолдау үшін ғылыми зерттеулер мен әзірлемелерге жәрдемдесуде Үкіметтің шешуші рөл атқаратынын жеткізді. Бұған ғылыми-зерттеу және тәжірибелік-конструкторлық жұмыстарға бөлінетін бюджеттің тұрақты өсуі ықпал етеді.
Азия даму банкі Қазақстанның даму саласындағы сенімді серіктесі ретінде инновацияларды енгізуге ықпал ететін жағдайды одан әрі жақсарту бойынша жұмыс істеуге дайын. Осылайша біз Қазақстанға цифрлық алшақтықты қысқартуға, экономикалық даму жолында кейбір кедергілерді белгілеуге және ешкімнің артта қалмауын қамтамасыз етуге көмектесеміз
, - деді ол.
Айта кетейік, бүгін Астана халықаралық форумы жұмысын бастады. Форум климаттың өзгеруіне, азық-түлік тапшылығына және энергетикалық қауіпсіздікке қатысты мәселелерді шешу жолдарын қарастыру мақсатында шетел үкіметтерінің, халықаралық ұйымдардың, бизнес пен ғылыми ортаның жоғары лауазымды делегаттарының диалогіне арналған алаң болмақ.