Қазақстан Берген университетінің профессорын марапаттады

ОСЛО. ҚазАқпарат – Ослодағы Қазақстан Елшілігінде Берген университетінің профессоры Гру Мандтқа «Қазақстан Республикасының Тәуелсіздігіне 30 жыл» мерекелік медалі табысталды, деп хабарлайды ҚазАқпарат Сыртқы істер министрлігіне сілтеме жасап.

2000-2006 жылдары Гру Мандт ЮНЕСКО мен Норвегия Сыртқы істер министрлігінің қолдауымен ұйымдастырылған норвегиялық мамандар тобының құрамында Алматы облысындағы Таңбалы петроглифтерін консервациялау, презентациялау және басқару жобасына қатысқан. Нәтижесінде 2004 жылы Тамғалы петроглифтерінің кешені ЮНЕСКО-ның Бүкіләлемдік мұра тізіміне енді.

Медальді Мемлекет басшысы Қасым-Жомарт Тоқаевтың атынан Елші Әділ Тұрсынов табыс етті. Марапатты Гру Мандтың ұлы – Тарье Мандт Ларсен мен ғалымның немерелері қабылдады. Іс-шараға Норвегияның Қазақстандағы бұрынғы Елшісі Оле Йохан Бьерной және «Таңбалы» жобасының норвегиялық жетекшісі, археолог Анна-София Хиген қатысты.