Қазақстан әскерилері елдегі төтенше жағдай режимін қалай қамтамасыз етіп жатыр
2022 жылғы 10 қаңтар 17:38

Қазақстан әскерилері елдегі төтенше жағдай режимін қалай қамтамасыз етіп жатыр

НҰР-СҰЛТАН. ҚазАқпарат - ҚР Президенті төтенше жағдай жариялаған сәттен бастап аталған режимді қамтамасыз ету үшін Қорғаныс министрлігінің бөлімшелері күшейтілген жұмысқа көшті, деп хабарлайды ҚазАқпарат.

Ең алдымен әскери бөлімдерді, қару-жарақ пен оқ-дәрі қоймаларын күзету күшейтілді.

Бұл өз кезегінде әскери қару-жарақтың қылмыскерлердің қолына түсуіне жол бермеді.

Сондай-ақ, әскери әуе айлақтарын, әуежайларды, халықтың тыныс-тіршілігін қамтамасыз ету объектілерін күзету күшейтілді.

Қарулы Күштердің әскери қызметшілері әкімшілік пен қаланың орталық алаңдарын қоршауға алуға жұмылдырылды.

Әскери қызметшілердің көпшілігі дәл осы қақтығыстарда зардап шекті. Өйткені бейберекет әрекет еткен адамдар тобы суық және атыс қаруларын, тастарды қолдана отырып жолындағының бәрін қиратқан.

Елдің бірқатар аймақтарында экстремистер әскери бөлімдерге шабуыл жасауға тырысты.

Дегенмен, содырларға қарулы тойтарыс беріліп, нәтижесінде олар әскери нысандарға кіре алмады.

Қазіргі уақытта барлық елді мекендерде Қарулы Күштердің әскери қызметшілері полиция және Ұлттық ұлан қызметкерлерімен бірлесіп тосқауыл бекеттерінде қызмет өткеріп, бақылап-өткізуді жүзеге асырып, сондай-ақ маңызды объектілерді күзетеді.

Қарулы Күштердің әскери қызметшілері терроризмге қарсы операция жүргізіліп жатқан Алматы өңірінде ерекше жауапты және қауіпті жауынгерлік міндеттерді орындауда.

Арнайы жауынгерлік іс-қимылдарға офицерлер мен келісімшарт бойынша әскери қызметшілер тартылды.

Ел Президенті жауынгерлердің батылдығына ерекше назар аударды.

Мемлекет басшысы отандастарымен мақтанатынын айтып, Қазақстанның одан әрі өсіп-өркендейтініне сенім білдірді.


Jańalyqtar

MURAǴAT