Қазақ пен мажарды ортақ тарихи тамыр біріктіреді - ҚР Президенті
«Виктор Орбан мырзаның елімізге ресми сапармен келуі - қазақ-мажар қарым-қатынасындағы жаңа қадам болды. Біздің келіссөздер екі ел арасындағы стратегиялық әріптестіктің 5 жылдығына орай өткізіліп отыр. Орталық Еуропа елдерінің ішінде Мажарстан Қазақстанмен стратегиялық әріптестік туралы декларацияға қол қойған тұңғыш ел екенін ерекше атап өту керек. Бұл - өзара терең түсіністіктің айқын дәлелі», - деді ҚР Президенті.
Сондай-ақ Мемлекет басшысы бұл Нұр-Сұлтан мен Будапешт арасындағы ынтымақтастықты нығайтуға деген екі елдің ұмтылысын көрсететінін баса айтты.
«Біз Мажарстанды Орталық және Шығыс Еуропа аймағындағы, Еуропалық одақ аясындағы негізгі әріптесіміз санаймыз. Елдерімізді саяси және экономикалық мүдделермен қатар халықтарымыздың ортақ тарихи тамыры біріктіретіндігін айрықша ризашылықпен атап өтемін. Ұлы дала көшпелілерінің 100 мыңнан астам ұрпағының басын қосып отырған мажар қыпшақтарының одағына Қазақстанның Тұңғыш Президенті Нұрсұлтан Әбішұлы Назарбаевтың құрметті лидер болып сайлануы - біздің достық және тығыз қатынасымыздың айқын айғағы. Бұл өзара байланыстың дамуына орасан зор үлес қосқан Елбасының ерен еңбегінің кеңінен мойындалғанын көрсетеді», - деді Қасым-Жомарт Тоқаев.