Қазақ қыздарына арналған музей беделді Халықаралық ұйымға мүше болды

None
None
АСТАНА. ҚазАқпарат - Қазақ мемлекеттік қыздар педагогикалық университетінің «Ақтұмар» тарихи-этнографиялық музейі штаб-пәтері Италияның Мерано қаласында орналасқан Халықаралық əйелдер музейі қауымдастығына мүше болды, деп хабарлайды ҚазАқпарат тілшісі.

"Бұл ұлтымыздың ұлылығын ұлықтау мақсатында қолға алынып отырған игілікті іс. Сонымен қатар, қазақ халқының рухани құндылықтарын шетелде насихаттауға бағытталған нақты қадам деп санаймыз. Бүгінде аталған қауымдастық құрамында әлемнің беделді музейлері бар", - деп атап өтті Баспасөз және қоғаммен байланыс бөлімінің басшысы Жандар Асан.

Университет музейі қызметкерлері биылғы жылдың қазан айында Түркияның Ыстанбұл қаласында өтетін I Еуропа және Азия Конгресіне қатысып, «Қазақстанның әйелдер тарихын қайта жаңғырту» тақырыбындағы баяндама жасамақ. Сонымен қатар, оқу орнының тарихынан сыр шертетін фото көрмені әлем жұртшылығының назарына ұсынғалы отыр. Алдағы уақытта Халықаралық ұйыммен бірлескен жобалар да жүзеге асырылмақ.

Айта кетейік, бүгінде Халықаралық əйелдер музейі қауымдастығына дүниежүзінің 80-нен астам мәдени нысаны мүше.

«Ақтұмар» музейі 2002 жылдың қараша айында құрылды. Кешен «Мәдени мұра» мемлекеттік бағдарламасына сәйкес дәстүрлі, мәдени-рухани құндылықтар арқылы студент жастарға елінің тарихын, тілін және көп ұлтты Қазақстанның тарихын құрметтеу қасиеттерін қалыптастыру мақсатында қызмет атқарады. Музей қорында оқу орнының құрылған уақтысынан бастап сыр шертетін жәдігерлер мен сирек фотосуреттер орналасқан. Атап айтқанда, Қыздар Университетінің қалыптасуы, дамуында еңбек сіңірген мемлекет және қоғам қайраткерлерінің, ректорлардың еңбектері, білім ордасының даңқты түлектері туралы ақпарат берілген. Сондай-ақ, музей экспозициясында қазақ мемлекетінің қалыптасуындағы қазақ әйелінің рөлі - көне заманнан қазіргі заманға дейін тыныс-тіршілігі көрсетілген.

Музейде «Аналар ұлағаты - елге аманат», «Университет тарихы», «Әйел әлемі» этно-коллекциясы», «Әйелдер шығармашылығы» және «Әйелдердің қоғамдағы рөлі» атты бөлімдер бар.

Мәдени кешенде экскурсиялар, студенттер мен түлектердің шығармашылық жұмыстарының көрмесі, танымдық сабақтар, дөңгелек үстелдер тұрақты түрде өткізіліп тұрады.

Соңғы жаңалықтар