Қазақ қаламгерлері «Túrkіstan tórіnde» келелі ойлар қозғады
Сырласу-сұхбат кешіне алғашқы қонақтар ретінде мемлекеттік сыйлықтың лауреаттары, көрнекті қаламгерлер Төлен Әбдік пен Нұрлан Оразалин, сондай-ақ танымал жазушы, кинодрамматург Смағұл Елубай қатысты. Жүздесуде облыс басшысы басқосудың маңыздылығына тоқталып, алдағы жоспарларымен бөлісті.
«Бұл идеяның мақсаты - танымал руханият майталмандарымен Түркістанның мәдениеті, тарихы, жалпы қалың қазақтың, түркі әлемінің болашағы жөнінде ой қозғау, ақылдасу. Өздеріңіз білетіндей, мемлекет басшылығы тарапынан Түркістан облысына, Түркістан қаласына айрықша қолдау көрсетіліп жатыр. Біз құрылыс нысандарын салуды және өзге де жұмыстарды уақытында атқара аламыз. Қаланы да саламыз. Бірақ сонымен бірге мәдениетіміз бен руханиятымызды да соған сай етуіміз керек. Мәдениет деген ұғым менің түсінігімде музыкамен, киномен, әдебиетпен ғана шектелмейді. Мәдениет - адамның болмысына сіңетін терең ұғым. Үйде де, көшеде де, өндірісте де, жұмыста да, ең алдымен мәдениет жоғары болуы тиіс. Біз Түркістанды түркі әлемінің мәдени-рухани орталығына айналдыруды көздеген болсақ, осы игі іске Қазақстандағы бар ресурстарымызды, интеллектуалды тұлғаларды жұмылдыруымыз керек. Міне, «Түркістан төрінде» жобасын қолға алудағы ойымыз да - осы»,- деді Өмірзақ Шөкеев.
Кездесуде сөз алған Төлен Әбдік алдымен жұртшылықты Түркістан облысының құрылғанына бір жыл толуымен құттықтап өтті. Киелі шаһардың жаңа мәртебе ие болғанына ерекше қуанғанын, ұлттық сананы жаңғыртуда бұл қаланың орны ерекше екенін жеткізді.
«Біз тәуелсіз ұлт болу процесін бастан өткерудеміз. Бірақ бұл мәселеде әлі жоғары деңгейге жете алған жоқпыз. Кешегі кеңестік санадан да, рулық санадан да толық арылдық деп айта алмаймыз. Осы үдерістерден өтіп, үлкен ұлтқа сай мінез көрсетіп, ғылым мен білімді дамытуымыз керек»,- деді жазушы.
Ал ақын, драматург Нұрлан Оразалин Түркістанның әдебиет пен өнердің орталығына айналатынына сенім білдіріп, қасиетті шаһарды дамыту, елді бірлікке шақыру туралы келелі ойлар қозғады.
Жазушы, кинодраматург Смағұл Елубай болса, қоғамды алға жетелеу үшін әр адамның иманын күшейту, дін мен ғылымды қатар дамыту керектігін айтты. Әсерлі жүздесуде Түркістан облысының шығармашылыққа құмар қауымы үш қаламгерге де, өңір басшысына да сұрақтарын қойып, пікір алмасты. Үздік сұрақтарымен көзге түскен оқырмандарға үш қаламгердің кітаптары сыйға тартылды. Кездесу соңында облыс әкімі Өмірзақ Шөкеев үш классик қаламгердің иығына шапан жауып, ерекше құрмет көрсетті.
Айта кетейік, алдағы уақытта «Түркістан төрінде» жобасы ай сайын өткізіліп тұратын болды. Оған Қазақстанның және түркі әлемінің көрнекті ақын-жазушылары мен қоғам қайраткерлері, спорт және өнер жұлдыздары, кәсіпкерлері, айтар ойы бар зиялы өкілдері қатысып, жұртшылықпен кездеседі. Телеарнадан толық көрсетілетін жоба арқылы Түркістан өңірінің рухани, мәдени, зияткерлік деңгейін көтеріп, бірлік пен ынтымақты, тұрақтылықты жан-жақты нығайтуға үлес қосу көзделген.
