Қазақ алфавитін 2025 жылға қарай латын графикасына көшіруге дайындық жұмысын осы бастан қолға алу қажет- Н. Назарбаев
«Біз алдағы уақытта да мемлекеттік тілді дамыту бағытындағы кешенді жобаларды жүзеге асыруды табандылықпен жалғастыра береміз. Қазақ алфавитін 2025 жылға қарай латын графикасына көшіруге дайындық жұмысын осы бастан қолға алу қажет. Бұл қазақ тілін жаңғыртып қана қоймай, оны осы заманғы ақпараттың тіліне айналдырады», - деді Елбасы.
Сонымен қатар, Н.Назарбаев терминология мәселесінде де қолға алар істердің әлі баршылық екенін айтты. «Мәселен, көне грек тілінен дүниеге жайылған «музей», «архив» секілді сөздер әлемнің барлық тілдеріне балдай батып, судай сіңіп кетсе де, біз оны «мұражай», «мұрағат» деп қазақшалап алдық. Маған келіп әлі күнге дейін айтады «композиторды» сазгер деп, «пианиноны» күйсандық деп аудару керек деп. Бұл барлық елде қолданылатын сөз», -деді Мемлекет басшысы.