Қатарда жәндіктерден жасалған тамақты сатуға тыйым салынды

АСТАНА. ҚазАқпарат – Қатар қоғамдық денсаулық сақтау министрлігі құрамында жәндіктері бар тамақ өнімдерін сатуға тыйым салды. Бұл шешім Еуроодақтың жеуге рұқсат етілген жәндіктер тізімін кеңейту туралы ;арлығынан кейін қабылданды, деп хабарлайды ҚазАқпарат ведомствоның Twitter аккаунтына сілтеме жасап.

«Қоғамдық денсаулық сақтау министрлігі кейбір елдердің тамақ дайындауда жәндіктерді пайдалануды мақұлдаған шешімі туралы ақпараттың таралуына байланысты құрамында жәндіктері бар тағамдарды сатуға тыйым салатынын мәлімдейді. Мұндай өнімдер халал тағамның техникалық талаптарына және жәндіктерді, протеинді немесе одан жасалған қоспаларды жеуге тыйым салатын биліктің діни пікіріне сәйкес келмейді», - делінген министрліктің хабарламасында.

Бұған дейін Еуропа азық-түлік қауіпсіздігі басқармасы қаулы шығарып, Еуроодақ елдерінде үй шегірткесінен жасалған ішінара майсыздандырылған ұнды жеуге рұқсат етілгені хабарланған еді.

Мұндай ұн шегірткелерді ұнтақтау арқылы алынады.

Оларды бір күн бойы тамақтандырмайды, содан кейін мұздатады, жуады, термиялық өңдеуден өткізеді, майсыздандырады, содан кейін ұнтақтайды.

Мұндай өнім ақуызға бай және ағзаға зиянсыз деп саналады.

Жаңа нормаларға сәйкес шегіртке ұнын пиццаға, макаронға, тағамдарға, тұздықтарға, пісіру қоспаларына, кейбір өңделген тағамдарға қосуға рұқсат етілген.

Фото: Jair Cabrera / Globallookpress.com