Қатар-2022: 1/8 финалдың алғашқы ойынында Нидерланд пен АҚШ кездеседі

АСТАНА. ҚазАқпарат - Қатарда өтіп жатқан футболдан 2022 жылғы әлем чемпионатында бүгін 1/8 финалында Нидерланд - АҚШ құрамалары кездеседі, деп хабарлайды ҚазАқпарат тілшісі.

Кездесу елорда уақытымен 21.00-де басталып, «Qazaqstan» және «Qazsport» телеарналарынан тікелей эфирде көрсетіледі.

Ойын ел астанасы - Доха қаласындағы 45857 жанкүйерге арналған «Халифа Интернейшнл» стадионында өткізіледі. Бас төреші - бразилиялық Вилтон Сампайо. Оған Бруно Бошилия мен Бруно Пирес. Қосалқы төреші - уругвайлық Андрес Матонте (Уругвай).

FIFA рейтингінде Нидерланд - 8, АҚШ 16-орында тұр.

Топтық кезеңде Нидерланд А тобында 7 ұпаймен бірінші орын алды. Олар Сенегал мен Қатарды 2:0 есебімен тізе бүктіріп, Эквадормен 1:1 есебімен тең түсті.

Ал В тобында АҚШ екінші орынға табан тіреді. Олар Иранды 1:0 есебімен жеңсе, Уэльспен 1:1, Англиямкен 0:0 есебімен тең түсті.

Екі құрама бұған дейін алты мәрте кездесті. Оның бесуінде нидерландтық футболшылар жеңіске жетсе, біреуінде американдық құрама басым түсті.

Сондай-ақ, елорда уақытымен 1.00-де Аргентина мен Австралия кездесуі «Qazaqstan» мен «Qazsport» телеарналарынан көрсетіледі.

Еске салсақ, әлем чемпионатының 1/8 финалына шыққан құрамалар анықталды.

Фото: bbc.com