Қасым-Жомарт Тоқаев: Кейбір пысықайлар алған субсидияны қалтаға басып келген

АСТАНА. ҚазАқпарат – 2019-2021 жылдары өнім өңдеуге берілген субсидияны 10 пайыз өндіруші ғана алған. Президент Қасым-Жомарт Тоқаев Үкіметтің кеңейтілген кеңесінде осындай мәлімет келтірді, деп хабарлайды ҚазАқпарат тілшісі.

«2019-2021 жылдары өнім өңдеуге берілген субсидияны алайық. Бұл қаражаттың тең жартысы субсидия алам деушілердің 10 пайызының ғана қолына тиген.

Субсидия алған кейбір пысықайлар өндірісті өркендетудің орнына бюджет қаржысын қалтасына басып, шалқып өмір сүрген», - деді Мемлекет басшысы.

Президенттің пайымынша, қарапайым шаруалар үшін субсидия алу – қияметтің қиыны.

«Оның үстіне, субсидия беру жүйесі өте күрделі және қажетті мәлімет көпшілікке қолжетімді емес. Субсидия бөлуді реттейтін жаңа цифрлық жүйе бұл түйткілді шеше алмай тұр», - деді Мемлекет басшысы.

Айта кетейік, Үкімет үйінде Президент төрағалығымен елдің әлеуметтік-экономикалық даму мәселелері жөнінде кеңес өтіп жатыр.