Каспий акваториясы арқылы елге 10 келі апиын мен 8 келі гашиш әкелмек болғандар сотталды
АСТАНА. ҚазАқпарат - Ұлттық қауіпсіздік комитеті есірткі заттарын контрабандалық жолмен тасымалдау фактісі бойынша үш шетелдік және бір қазақстандық азаматқа қатысты қылмыстық істі тергеуді аяқтады.
ҚО Ұлттық қауіпсіздік комитетінің баспасөз қызметі таратқан ақпаратта 2023 жылғы ақпанда Маңғыстау облысының Қылмыстық істер бойынша мамандандырылған соты есірткі қылмысына қатысушыларды ҚР ҚК 286-бабы 4-тармағына сәйкес кінәлі деп тауып, ұзақ мерзімге бостандықтарынан айыру туралы шешім шығарғаны айтылған.
Сотталушылар 2022 жылы тамызда Қазақстанға Каспий теңізінің акваториясы арқылы 10 келі апиын мен 8 келі гашиш әкелмек болған әрекеттері үстінде ұсталды.
Шетелдің азаматтары мемлекеттік шекараны қайықпен заңсыз кесіп өткен. Қылмыскерлер қолданған қайық жеңіл әрі жылдам қозғалатындықтан оны радиолокациялық құралдармен анықтау қиындық тудырған.
Есірткі көзге түсу қауіп төмен, яғни түн мезгілінде тасымалданған. Қылмыскерлер навигация үшін GPS және спутниктық байланыс құралдарын пайдаланған.
«Сот барысында сотталушылардың кінәсі қылмыстық іс материалдарымен толық дәлелденді. Есірткі бизнесіне қарсы күрес жұмысы жалғасуда»,- ҚР Ұлттық қауіпсіздік қызметінің баспасөз қызметі таратқан ақпаратта.
