Қашаған кен орны мұнай өндірісін уақытша тоқтатады

АТЫРАУ. ҚазАқпарат - Атырау облысындағы Қашаған теңіз кен орнында мұнай өндірісі 45 күнге тоқтатылады, деп хабарлайды ҚазАқпарат тілшісі.

«Осы айда Қашаған кен орнында мұнай өндіру жұмыстары уақытша тоқтатылады. NCOC компаниясы жер үстіндегі «Болашақ» зауытында және жасанды D аралында жабдықтардың күрделі жөндеуіне кіріседі. Дайындық шаралары жүргізілуде. Жөндеу жұмыстарының жоспарлы ұзақтығы - 45 күн. Оған NCOC-тың және серіктес-мердігерлердің 5 мыңға жуық қызметкері жұмылдырылатын болады», - деп мәлім етті компанияның баспасөз қызметінен.

Еске салайық, Қазақстандағы ең ірі кен орын - Қашағанда 2018 жылдың нәтижесі бойынша мұнай өндірісі 1,6 есе ұлғайды.

ҚР Энергетика министрлігінің ақпаратына сәйкес, өндіріс көлемі жоспарланған 11 млн тоннадан 13,22 млн тоннаға артты. 2017 жылы мұнай өндірісі 8,3 млн тоннаны құраған болатын. Қашаған әлемдегі ең ірі мұнай кеніштерінің бірі болып танылған. Оның жалпы мұнай қоры 38 млрд баррельді құрайды. Табиғи газ қоры - 1 трлн текше метрден астам.

Авторы А.Соколов