Қарияны өрттен құтқарған ағайынды оқушыларға министр алғыс айтты

ҚАРАҒАНДЫ. ҚазАқпарат - 23 қаңтарда сағат 16:38-де Қарағанды қаласы Жеңіс көшесінің бойында өрт шыққаны туралы хабарлама келіп түскен, деп хабарлайды ҚазАқпарат ТЖМ-ге сілтеме жасап.

6 шаршы метр аумақта тұрғын үйге жалғанған қазандықтың жиһазы, тұрмыстық техникасы, ішкі ағаш қаптамалары, төбесі жанған. Өртті өрт сөндірушілер сөндірді.

Өрт кезінде қарды тазалауға көрші үйде тұратын 15 жастағы Ерасыл мен 14 жастағы Қанат көмектескен. Олар көршілерінің үйінен түтін шығып жатқанын көрді және құтқарушыларды шақырды. Жігіттер еш ойланбастан көмекке ұмтылды, түтін ішінде қалған қарияны құтқарды.

Көп ұзамай Оқу-ағарту министрі Ғани Бейсембаев егде жастағы көршілерін өрттен құтқарған қарағандылық оқушыларға, ағайынды Ерасыл мен Қанат Смағұловтарға алғыс хат жолдады. Жеткіншектердің арқасында өрттен ешкім зардап шеккен жоқ. Олар қаладағы №12 мектепте білім алады.

«Сендерге адам өмірін құтқаруға қадам басқан ержүрек батырлықтарың үшін зор алғысымды білдіремін. Өз өмірлеріңе қауіп төніп тұрса да, тәуекелге бел буып, нағыз ерлік жасап, үлкен қайғының алдын алдыңдар. Мұндай әрекетке барудың өзі үлкен жүректілік пен батылдықты, қайсарлықты талап етеді. Жасаған қадамдарың рухы берік, нағыз батырдың әрекеті деп білемін.Сендер болашақта ата-бабамыздан мирас болып қалған еліміздің кең даласын, асқар тауын, сарқырап аққан көк өзенін қорғайтын, халықтың мақтанышына айналатын нағыз патриот азамат болып шығатындарыңа сенімім мол.Болашақтарың жарқын болсын!», – деп жазды министр жолдаған алғыс хатында.

Фото: gov.kz