Карантинге жіберілетін дәрігерге өтемақы қалай төленуі тиіс
«Кей өңірлер (Қарағанды облысы) мен медициналық ұйымдардың (Ақмола, Павлодар облыстары) өз шешімдерімен 14+14 кестесін бекіткен. Яғни, психологиялық және эмоционалдық жүктеме, дерт жұқтыру қаупін ескере отырып, 14 күн жұмыс істеген мамандарды 14 күн карантинге жібереді. Мұндай жағдайда Денсаулық сақтау министрлігі медицина мамандарының демалуы үшін қауіпсіз жағдай жасауды талап етеді. Көптеген өңірлерде мамандар инфекциялық ауруханада түнемейді, қолайлы қонақүйлерге кетеді. Бұл үшін өңір әкімдеріне алғыс айтамын», - деп жазды Е. Біртанов Facebook-те.
Сонымен бірге, министр Бас санитарлық дәрігер Қаулысының 6-бөлігіне сәйкес, қорғаныс құралдарынсыз COVID-19 науқасына медициналық көмек көрсеткенде, инфекция жұқтыру қаупі жоғары болғанда ғана 14 күнге жұмыстан оқшаулау қарастырылатынын түсіндірді.
«Бұл жағдайда мынадай шаралар жасалады: маман 14 күнге жұмыстан шеттетіледі, үй немесе стационарлық карантинге оқшауланады, зертханалық тексеруге биоматериал алынып, күнделікті медициналық бақылау жүргізіледі. Нәтиже оң болған жағдайда, емдеуге жіберіледі. Ал инфекция табылмаса, 14 күннен кейін қосымша тексеруден өтіп қана, жұмысқа қайта оралады. Яғни, медициналық маман науқаспен байланыста болған адам ретінде карантинге жіберіледі», - деді Е. Біртанов.
Бірақ, министр көптеген жағдайда медицина мамандары кезекшілігі аяқталғаннан кейін, сақтану ретінде карантинге жіберілетінін айтты.
«Бұдан кейін 14 күннің өтемақысы мәселесі туындайды. Неге екені бұл күндер үшін еңбекке жарамсыздық парағы рәсемделеді. Мұны заңсыз деп есептеймін. Өйткені, мұнда қызметкер табысынан айырылады. Еңбек кодексіне сәйкес, жұмыстан уақытша шеттетуді рәсімдеу мен өтемақы төлеу тәртібі еңбек және ұжымдық келісімшартпен бекітіледі және ең төменгі жалақы мөлшерінен кем емес көлемде төлем тағайындалуы тиіс», - деп түсіндірді Е. Біртанов.
Бұған дейін ведомство басшысы дәрігерлерге үстемеақы төлеуде қандай заңбұзушылықтар анықталғанын айтып берді.
Наурыз айында республиканың 17,5 мың медицина маманына 3 млрд теңгеден астам сомаға үстемеақы төленді.