Қарағандылық инспекторлар бес бөлтірікті құтқарды
«2019 жылдың 24 сәуірінде «Қарағанды облыстық аумақтық орман шаруашылығы және жануарлар әлемі инспекциясы» РММ мемлекеттік инспекторлары әлеуметтік желіден бөлтіріктерді апаннан шығарған бұзақыларды байқаған. Инспекция мамандары табиғатты қорғау мамандарымен бірлесіп, оқиға орнына барды», - деп жазды ҚР АШМ Орман шаруашылығы және жануарлар әлемі комитетінің баспасөз хатшысы Сәкен Ділдахмет Фейсбукте.
Оқиға орнында Қарағанды облысы Ақтоғай ауданы Қызыларай ауылының Е. есімді тұрғыны ұсталды.
«Ауыл тұрғыны 24 сәуір күні сағат 15.00-де Қызыларай мемлекеттік табиғи қорығы аумағындағы Ақсораң тауларынан 5 бөлтірікті (3 ұрғашы, 2 еркек) үйіне әкелген. Осылайша, жабайы аңдар туралы ҚР заңнамасын бұзған. Оған қатысты ҚР ӘҚБК 389-бабы, 1-тармағы бойынша әкімшілік құқықбұзушылық жөнінде хаттама толтырылды. Құтқарылған бөлтіріктер өз апанына жеткізіледі», - деді С. Ділдахмет.
