Қарағандыдағы Жұлдыздар аллеясына Жәния Әубәкірованың атаулы жұлдызы орнатылды
Салтанатты шара алдында «Шалқыма» концерт залында Жәния Әубәкірованың шығармашылық кеші өтті. Ол Е. Рахмадиев атындағы Қарағанды симфониялық оркестрінің сүйемелдеуімен өнер көрсетті.
«Сіз Қарағандыдағы тамаша дәстүрді жақсы білесіздер. Жыл сайын «Әуенді Сарыарқа» фестивалі әр елден келген шығармашылық ұжымдар мен әртістерді жинайды. Қарағандылықтар оларды жылы қарсы алды. Бүгін бұл дәстүр жалғасуда. Тағы бір тамаша дәстүр бойынша Даңқ аллеясында 12 жыл бойы көрнекті өнер қайраткерлерінің құрметіне жаңа жұлдыз жағылады. Бүгін біз тамаша пианиношы, тамаша педагог, бірқатар дарынды шәкірттің ұстазы– Жәния Әубәкіроваға құрмет көрсетеміз», - деді Қарағанды облысының әкімі Жеңіс Қасымбек.
Өңір басшысы Ж.Әубәкірова үшін Қарағанды жері бөтен емес екенін атап өтті. Қарағанды облысында оның әкесі дүниеге келген. Музыканттың өзі Шет ауданының құрметті тұрғыны.
Салтанатты түрде «Шалқыма» сахнасында Жания Әубәкірова жұлдыздар аллеясының Құрмет кітабына өз есімін енгізді.
Кеш барысында ҚР Мәдениет және спорт министрі Ақтоты Райымқұлованың Халық әртісіне жолдаған құттықтау хаты да оқылды.
Ал қоғам қайраткерінің өзі Қарағандыға әрдайым ерекше сезіммен келетінін айтып өтті. «Шығармашылыққа деген қызығушылықтарыңыз, классикалық музыкаға деген махаббаттарыңыз үшін рахмет. Қарағандылық оркестрмен бірге ойнаған мен үшін ерекше бақыт», - деді Жәния Әубәкірова.
Ауа райының қолайсыздығына қарамастан «Кенші Даңқы» ескерткішінің жанында Жұлдыздар аллеясына көптеген қарағандылықтар, өнерсүйер қауым жиналды. Ескерткіш белгінің ашылуынан кейін Қарағандының кешкі аспаны атақты пианиношының құрметіне отшашумен жарқырады.
«Мен ерекше толқып тұрмын. Бұл керемет, салтанатты, осындай жылы және махаббатқа толы болады деп күткен жоқпын. Ұмытылмас сәт. Бұл өнер адамдарын керемет қанаттандырады. Мен – бақыттымын. Әрине, Қарағанды жерінде менің өнерім мойындалатыны – мен үшін ерекше марапат, ерекше мақтаныш. Бұл – мен үшін аса қымбат. Шығармашылық, шабыт, жалпы өмірім үшін өте күшті серпін береді», - деді Жәния Әубәкірова.
Халық әртісі Қарағанды облысының өркендеуін тіледі.
Айта кетейік, Жұлдыздар аллеясы Қарағандыда 2007 жылы пайда болды. Оның ашылуы «Қарағанды - менің жастық шағымның қаласы» атты бірінші ретро-фестиваліне орайластырылды. Мұнда бірінші жұлдыз Халық әртісі Бибігүл Төлегенованың құрметіне жағылды. Кейін Роза Рымбаеваның, «Дос Мұқасан» ансамблінің, Қайрат Байбосыновтың, Ескендір Хасанғалиевтің, Мақпал Жүнісованың, Болат Сыздықовтың және басқа да мәдениет және өнер қайраткерлерінің атаулы белгілері пайда болды.
Ж. Әубәкірованың құрметіне арналған атаулы белгі осымен оныншы болып отыр.
Жәния Әубәкірова 1957 жылы 19 сәуірде Алматыда дүниеге келген. П. И. Чайковский атындағы Мәскеу мемлекеттік консерваториясын бітірді. Сондай-ақ профессор Л. Н. Власенконың жетекшілігімен аспирантураны тәмамдады. Көрнекті қазақ пианиношысы әлемдік музыка аренасында еліміздің даңқын арттырған, Қазақстанда және шетелде үнемі шеберлік сабақтарын өткізеді.
1997 жылдан бастап 2018 жылға дейін Құрманғазы атындағы Қазақ ұлттық консерваториясын басқарды. 1994 жылы Замануи білім беру әдістері мен технологиялары бойынша жұмыс істейтін Жәния Әубәкірованың авторлық мектебін құрды.
1991 жылы ҚР Халық әртісі атағына ие болды. Әдебиет және өнер саласындағы ҚР Мемлекеттік сыйлығының лауреаты (2002), Қазақстан Республикасы Тұңғыш Президентінің Мемлекеттік бейбітшілік және прогресс сыйлығының лауреаты (2012). «Платиналы Тарлан» тәуелсіз сыйлығының лауреаты. Франция өнер және әдебиет орденінің кавалері. Еуропада, Польшада және Ресейде жоғары наградалармен атап өтілген.