Қарағандыда онкологиялық аурулары бар балаларға арналған паллиативтік орталық ашылды
Светлана Алтынбекова – жаңа орталықтың алғашқы келушілерінің бірі. Көпбалалы ана екі ерекше бала тәрбиелеп отыр. Оның ұлы Шыңғыс церебралды сал ауруымен ауырады. Әйел ұзақ жылдар бойы Қарағандыда дәл осындай орталықтың ашылуын күтіп жүргенін айтады.
«Мен қалада осындай орталық пайда болғанына қуаныштымын. Ерекше балалардың ата-аналарына проблемаларымен жалғыз кұресу қиын. Көбіне бізге моральдық қолдау қажет болады», – деді Светлана.
Орталықты құру Қазақстан паллиативтік көмек көрсету қауымдастығының бастамасымен және AMANAT партиясы депутаттарының қолдауымен жүзеге асырылды.
Ашылу күні кішкентай пациенттер үшін аниматорлардың қатысуымен ойын-сауық бағдарламасы ұйымдастырылды. Ал аналарға сыйлықтар, гүлдер ұсынылып, азық-түлік себеттері дайындалды.
«Паллиативті медициналық көмек көрсету – бұл өмірге қауіпті ауруларға байланысты проблемаларға тап болған пациенттер мен олардың отбасыларының өмір сүру сапасын жақсартуға бағытталған тәсіл. Ерте диагностиканың, дұрыс бағалау мен емдеудің, сондай-ақ физикалық, психоәлеуметтік немесе рухани болсын, басқа да проблемаларды шешудің арқасында паллиативтік көмек науқастардың ауруын жеңілдетуге мүмкіндік береді», – деп атап өтті Қазақстан балаларына паллиативтік көмек қауымдастығының директоры Әлия Қадырәлиева.
Орталық қызметкерлері өз қамқорлығындағы адамдарға сапалы көмек көрсете алуы үшін медицина қызметкерлері мен ата-аналарға оқыту курстарын өткізуді көздеп отыр. Қазір арнайы пациенттер кіретін клиенттік база мен мобильді топ құру жоспарланған.
Айта кету керек, алғашқы паллиативтік орталық Алматы облысында ашылды және біраз уақыттан бері ерекше балаларды қабылдап келеді. Қарағандыда мұндай мекеме Әлиханов көшесі, 20 мекенжайында орналасқан.
